વોશિંગ્ટન, તા. 28: અમેરિકામાં છેલ્લા કેટલાક સમયથી લઘુમતી સમુદાયના ધાર્મિક સ્થળો, ખાસ કરીને હિન્દુ મંદિરો પર વધી રહેલા હુમલા અને તોડફોડની ઘટનાઓને રોકવા માટે યુએસ કોંગ્રેસમાં એક શક્તિશાળી દ્વિપક્ષીય બિલ રજૂ કરવામાં આવ્યું છે. 'સેફગાર્ડિંગ એક્સેસ ટુ કોન્ગ્રીગેશન્સ એન્ડ રિલીજીયસ એસ્ટાબ્લિશમેન્ટ્સ ફ્રોમ ડિસરપ્શન' એટલે કે SACRED Act નામનું આ બિલ હિન્દુ મંદિરો સહિતના તમામ ધાર્મિક સ્થળોને સુરક્ષા કવચ પૂરું પાડશે.
ડર વગર પૂજા કરવાનો અધિકાર
આ બિલ સાંસદ ટોમ સુઓઝી અને મેક્સ મિલર દ્વારા સંયુક્ત રીતે રજૂ કરવામાં આવ્યું છે. આ કાયદા હેઠળ કોઈ પણ ધાર્મિક સ્થળના 100 ફૂટના વિસ્તારમાં કોઈ વ્યક્તિને ડરાવવી, અવરોધ ઉભો કરવો કે પજવણી કરવી એ હવે ગંભીર ફેડરલ ગુનો ગણાશે. સાંસદ સુઓઝીના જણાવ્યા અનુસાર, "કોઈ પણ વ્યક્તિ તેની પૂજાના સ્થળે જતી વખતે ડર કે ધમકીનો શિકાર ન બનવી જોઈએ."
હિન્દુ અમેરિકન ફાઉન્ડેશને વ્યક્ત કરી ચિંતા
હિન્દુ અમેરિકન ફાઉન્ડેશને આ બિલનું સ્વાગત કરતા જણાવ્યું છે કે, અમેરિકાભરમાં હિન્દુ મંદિરોને નિશાન બનાવવાની અને તેની અપવિત્રતા કરવાની ઘટનાઓમાં ચિંતાજનક વધારો થયો છે, જેના કારણે શ્રદ્ધાળુઓમાં અસુરક્ષાની લાગણી જન્મી છે. માત્ર હિન્દુ જ નહીં, પરંતુ યહૂદી સભાસ્થાનો (Synagogues), મસ્જિદો અને ચર્ચો પણ સમાન પ્રકારના જોખમોનો સામનો કરી રહ્યા છે.
કડક સજાની જોગવાઈ
નવા બિલ મુજબ, કાયદાનું ઉલ્લંઘન કરનારને પ્રથમ ગુના માટે એક વર્ષ સુધીની જેલની સજા અથવા દંડ થઈ શકે છે. જો આ ગુનો ફરીથી કરવામાં આવે, તો ત્રણ વર્ષ સુધીની કડક જેલની સજાની જોગવાઈ છે. આ ઉપરાંત, પીડિતો સિવિલ કેસ પણ ફાઇલ કરી શકશે અને યુએસ એટર્ની જનરલ આ મામલે સીધો હસ્તક્ષેપ કરીને નુકસાનની ભરપાઈ કરાવી શકશે.
બધા જ ધર્મોનું સમર્થન
રસપ્રદ વાત એ છે કે આ બિલને એન્ટી-ડેફામેશન લીગ, અમેરિકન જીવિત કમિટી અને ઇસ્લામિક સોસાયટી ઓફ નોર્થ અમેરિકા જેવા વિવિધ ધાર્મિક સંગઠનોનું સમર્થન મળ્યું છે. અમેરિકામાં વધી રહેલા હેટ ક્રાઈમ્સને જોતા સાંસદો માને છે કે જાહેર સુરક્ષા અને બંધારણીય અધિકારો વચ્ચે સંતુલન જાળવવા માટે આ કાયદો અનિવાર્ય છે. જોકે, શાંતિપૂર્ણ વિરોધ પ્રદર્શનના અધિકારો અકબંધ રહેશે, પરંતુ શ્રદ્ધાળુઓની આસ્થામાં ખલેલ પહોંચાડનારા તત્વો સામે કડક કાર્યવાહી કરવામાં આવશે.