પટણા : બિહારના મુખ્યમંત્રી સમ્રાટ ચૌધરીની અધ્યક્ષતામાં મળેલી મંત્રીમંડળની મહત્વપૂર્ણ બેઠકમાં રાજ્યના વિકાસ, શિક્ષણ અને કૃષિ ક્ષેત્રને વેગ આપતા અનેક ક્રાંતિકારી નિર્ણયો લેવામાં આવ્યા છે. પટણામાં રાજ્યની પ્રથમ મહિલા યુનિવર્સિટી 'માતા સીતા મહિલા યુનિવર્સિટી' ની સ્થાપના કરવાની સાથે-સાથે પશુપાલકોની આવક બમણી કરવા માટે ગાય અને ભેંસની ખરીદી પર ૧૦૦% વ્યાજમુક્ત લોન આપવાની જાહેરાત કરવામાં આવી છે.

પટણામાં 'મા સીતા' અને બેગુસરાયમાં 'દિનકર' યુનિવર્સિટી

શિક્ષણ ક્ષેત્રે સ્ત્રી સશક્તિકરણનું ઉત્કૃષ્ટ ઉદાહરણ પૂરું પાડતાં પટણામાં 'માતા સીતા મહિલા યુનિવર્સિટી' શરૂ કરવાની મંજૂરી અપાઈ છે. આ યુનિવર્સિટીની સૌથી મોટી વિશેષતા એ હશે કે પટાવાળાથી લઈને કુલપતિ (VC) સુધીના તમામ પદો પર માત્ર મહિલા કર્મચારીઓ જ તૈનાત રહેશે, અને પ્રવેશ પણ માત્ર કન્યાઓને જ મળશે.

આ ઉપરાંત, રાષ્ટ્રકવિ રામધારી સિંહ દિનકરની જન્મજયંતિ નિમિત્તે તેમની સાહિત્યિક ચેતનાને જીવંત રાખવા બેગુસરાયમાં 'રામધારી સિંહ દિનકર યુનિવર્સિટી' ની સ્થાપનાનો પ્રસ્તાવ પાસ કરવામાં આવ્યો છે, જેના સ્ટાફ અને સંચાલન માટે ₹૧૫ કરોડની જોગવાઈ કરાઈ છે.

પશુપાલકો માટે ₹૧,૬૦૦ કરોડનું બજેટ અને ખાંડ મિલ

ખેડૂતો અને પશુપાલકોની આર્થિક સ્થિતિ સુધારવા માટે 'મુખ્યમંત્રી ગૌ સંપત્તિ વિકાસ લોન યોજના' હેઠળ ₹૧,૬૦૦ કરોડથી વધુનું બજેટ ફાળવાયું છે. આ યોજના હેઠળ ૩ સુધારેલી ગાયો અથવા ૨ ભેંસો ખરીદવા માટે બેંકમાંથી મળનારી લોનનું ૧૦૦% વ્યાજ સરકાર ભોગવશે અને લાભાર્થીએ માત્ર મૂળ રકમ જ ચૂકવવાની રહેશે.

સાથે જ, કોસી ક્ષેત્રમાં ડેરી વિકાસ માટે ₹૧૨૬.૦૭ કરોડના ખર્ચે ૫૦૦ નવી દૂધ સહકારી સંસ્થાઓ અને ચિલિંગ સેન્ટરો સ્થપાશે. ઉપરાંત, નવાદાના વારીસાલીગંજમાં ₹૫૦૦ કરોડના રોકાણથી નવી શુગર મિલ સ્થાપવાની મંજૂરી અપાઈ છે, જેથી નાલંદા, શેખપુરા અને જમુઈના હજારો ખેડૂતોને આજીવિકા મળશે.