કોટ્ટાયમ, તા.30: કેરળની પ્રખ્યાત મહાત્મા ગાંધી યુનિવર્સિટી (MGU) કેમ્પસમાં વંદા (કોકરોચ) ની છબીવાળા વિવાદાસ્પદ પોસ્ટરોને લઈને યુનિવર્સિટી વહીવટીતંત્ર અને વિદ્યાર્થી સંઘ વચ્ચેનો વિવાદ ચરમસીમાએ પહોંચ્યો છે. આ વિવાદ એટલો વધી ગયો છે કે યુનિવર્સિટીએ આગામી રાષ્ટ્રીય પરિષદ માટે મંજૂર કરવામાં આવેલી લાખો રૂપિયાની નાણાકીય સહાય પાછી ખેંચવાની સત્તાવાર પ્રક્રિયા શરૂ કરી દીધી છે.
ઘટનાની વિગતો મુજબ, આગામી 3 થી 6 ઓગસ્ટ દરમિયાન કેમ્પસમાં યોજાનારી રાષ્ટ્રીય પરિષદના આયોજન માટે યુનિવર્સિટીએ અગાઉ ₹3.75 લાખની વહીવટી મંજૂરી આપી હતી અને એડવાન્સ પેટે ₹2.81 લાખ પણ ચૂકવી દીધા હતા. પરંતુ SFI સમર્થિત યુનિવર્સિટી યુનિયને પ્રચાર માટે જે પોસ્ટરો અને બેનરો લગાવ્યા, તેમાં બૂટ સામે ઊભેલા વંદાનું ચિત્ર દર્શાવવામાં આવ્યું હતું. આ ચિત્ર નવી દિલ્હીમાં તાજેતરના વિદ્યાર્થી આંદોલન દરમિયાન પ્રતિકારનું પ્રતીક બન્યું હતું, જેને લઈને વિવાદ સર્જાયો છે.
યુનિવર્સિટીના રજિસ્ટ્રારે જારી કરેલી કડક નોટિસમાં સ્પષ્ટતા કરવામાં આવી છે કે આ પ્રકારની સામગ્રી યુનિવર્સિટીના ભંડોળથી ચાલતા કાર્યક્રમોમાં રાજકીય પ્રદર્શનો પરના પ્રતિબંધ અને વિદ્યાર્થીઓની આચાર સંહિતા (નિયમો, 2005) નું ખુલ્લેઆમ ઉલ્લંઘન કરે છે. જો યુનિયન આ મામલે યોગ્ય ખુલાસો નહીં કરે અથવા પોસ્ટરો નહીં હટાવે, તો યુનિવર્સિટી દ્વારા અગાઉ આપવામાં આવેલી એડવાન્સ રકમ ફરજિયાતપણે પાછી વસૂલવામાં આવશે તેવી ચીમકી પણ આપવામાં આવી છે.
બીજી બાજુ, વિદ્યાર્થી યુનિયને યુનિવર્સિટીના આ આદેશ સામે બંડ પોકાર્યું છે. યુનિયનના અધ્યક્ષ એમ. અભિનવે સ્પષ્ટ શબ્દોમાં નિવેદન આપ્યું છે કે પોસ્ટરો ઉતારવાનો કોઈ પ્રશ્ન જ ઉદ્ભવતો નથી. તેમણે વહીવટીતંત્ર પર વિદ્યાર્થીઓની અભિવ્યક્તિની સ્વતંત્રતાને દબાવવાનો ગંભીર આરોપ મૂક્યો છે.
ઉલ્લેખનીય છે કે, આ અગાઉ પેપર લીક વિરુદ્ધના આંદોલનમાં પણ વંદા (કોકરોચ) ની છબી પ્રતીક તરીકે વપરાઈ હતી. હવે ઓનલાઈન ઝુંબેશ બાદ કેમ્પસના મુખ્ય પ્રવેશદ્વાર પર જ વિશાળ બેનર લગાવી દેવાતા કુલપતિ ડી. માવુથુ અને વિદ્યાર્થી સંગઠન વચ્ચે રાજકીય ઘમાસાણ મચી ગયું છે, જેના કારણે આગામી દિવસોમાં આ વિવાદ વધુ ઉગ્ર બને તેવા પૂરા એંધાણ છે.