મુંબઈ, તા.29: દેશની અગ્રણી અદાલતોમાં સુરક્ષા અને મર્યાદાને લઈને ગંભીર સવાલો ઊભા કરતી એક અત્યંત ચોંકાવનારી ઘટના મુંબઈ ખાતે સ્થિત બોમ્બે હાઈ કોર્ટના કોર્ટરૂમમાં પ્રકાશમાં આવી છે. મિલકતના કબજા સાથે જોડાયેલી અવમાનના અરજીની સુનાવણી ચાલી રહી હતી તે દરમિયાન ન્યાયાધીશનો આદેશ પોતાની વિરુદ્ધમાં જતાં મિંડર ગુરમીત સિંહ ઠુકરાલ નામની મહિલા અચાનક આવેશમાં આવી ગઈ હતી અને તેણે ન્યાયમૂર્તિ માધવ જામદાર તરફ પોતાનું પર્સ ફેંકવાનો ગંભીર પ્રયાસ કર્યો હતો.

પ્રાપ્ત વિગતો અનુસાર, આ સમગ્ર વિવાદ વર્ષ ૨૦૦૯થી ચાલી રહેલા મિલકત ખાલી કરાવવાના કાનૂની કેસ સાથે સંકળાયેલો છે, જેમાં અદાલતે અગાઉ મિલકતના મૂળ માલિકની તરફેણમાં ફેંસલો આપ્યો હતો. એપ્રિલ ૨૦૨૫ માં હુકમનો અમલ થયા બાદ પણ પ્રતિવાદી પક્ષ દ્વારા ફરીથી ગેરકાયદેસર રીતે મિલકતમાં પ્રવેશ કરવામાં આવ્યાના આક્ષેપ સાથે વારસદારોએ હાઈ કોર્ટમાં કોર્ટની તિરસ્કાર અંગેની અરજી દાખલ કરી હતી, જેની સુનાવણી ન્યાયમૂર્તિ માધવ જે. જામદારની ખંડપીઠ સમક્ષ ચાલી રહી હતી.

સુનાવણી દરમિયાન જેવો આદેશ વિરુદ્ધમાં આવ્યો કે તરત જ મહિલા રડવા અને બૂમો પાડવા લાગી હતી અને અદાલતી કાર્યવાહીની મર્યાદાઓ નેતાવે મૂકીને ન્યાયાધીશ તરફ પર્સ ફેંકવા માટે આગળ વધી હતી. જોકે, ત્વરિત સમયમાં તેણે પોતાને અટકાવી લીધી હતી, પરંતુ આ અણધારી અને આઘાતજનક હરકતને કારણે કોર્ટરૂમમાં હાજર વકીલો અને પક્ષકારોમાં ભારે અફરાતફરી અને આશ્ચર્ય ફેલાઈ ગયું હતું.

ઘટનાની ગંભીરતાને ધ્યાનમાં રાખીને ન્યાયમૂર્તિએ તાત્કાલિક હાઈ કોર્ટના સુરક્ષા કર્મચારીઓને બોલાવીને મહિલાને કોર્ટરૂમમાંથી બહાર ખસેડવાનો આદેશ આપ્યો હતો. અદાલતના કડક વલણને જોઈને મહિલાએ બાદમાં લેખિતમાં માફી પણ માંગી હતી, પરંતુ ન્યાયમૂર્તિએ તેના આ વર્તનને અત્યંત ગંભીર અદાલતી અવમાનના ગણાવીને માફી સ્વીકારવાનો ઇનકાર કર્યો હતો અને આ માىલે અન્ય પ્રતિવાદીઓની ભૂમિકાની પણ ઊંડાણપૂર્વક તપાસ કરવાનો નિર્દેશ આપ્યો હતો.

અદાલતે કડક શબ્દોમાં સ્પષ્ટ કર્યું હતું કે ન્યાયિક પ્રક્રિયામાં અડચણ ઊભી કરવી અને કોઈ પક્ષની વિરુદ્ધમાં આદેશ આવે એટલે અદાલતમાં મનસ્વી કે આક્રમક વર્તન કરવું ક્યારેય સાંખી લેવામાં આવશે નહીં અને અદાલતની ગરિમા સર્વોપરી છે.

આ મામલાની આગામી સુનાવણી ૩૦ ઑક્ટોબર, ૨૦૨૬ ના રોજ મુકરર કરવામાં આવી છે, ત્યારે આ ઘટનાએ ન્યાયાલયોની અંદર ન્યાયાધીશોની સુરક્ષા અને અદાલતી શિસ્તને લઈને વ્યાપક ચર્ચાઓ છેડી દીધી છે.