નવી દિલ્હી, તા.૧૬: બે પરમાણુ સશસ્ત્ર પડોશી દેશો ભારત અને પાકિસ્તાન વચ્ચે ફરી એકવાર દરિયાની મધ્યમાં કૂટનીતિક તણાવ ચરમસીમાએ પહોંચ્યો છે. ૧૫ સપ્ટેમ્બરની સાંજે ઉત્તર અરબી સમુદ્રમાં, ઓમાનના કિનારેથી આશરે ૨૨૦ કિલોમીટર દૂર આંતરરાષ્ટ્રીય પાણીમાં ભારતીય નૌકાદળ અને પાકિસ્તાની નેવીના યુદ્ધ જહાજો સામસામે આવી ગયા હતા. નિયમિત દેખરેખ રાખી રહેલા ભારતીય યુદ્ધ જહાજ તરફ પાકિસ્તાની જહાજે અત્યંત ઝડપી અને અસુરક્ષિત ગતિએ ધસી આવીને ઉશ્કેરણીજનક ચાલબાજી કરી હતી.

આ હાઇ-સ્પીડ મુકાબલા દરમિયાન ભારતીય સૈનિકોની ત્વરિત અને સુઝબુઝ ભરેલી સીમેનશિપના કારણે કોઈ મોટી હોનારત કે જાનહાનિ ટળી હતી. જોકે, પાકિસ્તાનની આ નાપાક હરકત પર ભારતે ભારે આક્રોશ વ્યક્ત કર્યો છે. નવી દિલ્હીએ પાકિસ્તાનના ચાર્જ ડી'અફેર્સ સાદ અહમદ વારૈચને તત્કાલ સમન્સ પાઠવીને આ કાર્યવાહીને "અસ્વીકાર્ય અને અવ્યાવસાયિક" ગણાવી ઔપચારિક ડિમાર્ચ નોંધાવી છે.

૨૦૧૧ની એ ખોફનાક ઘટના પુનરાવર્તિત થઈ
આ રોમાંચક અને તણાવપૂર્ણ ઘટનાએ ૧૫ વર્ષ પહેલાં જૂન ૨૦૧૧માં બનેલી ઘટનાની યાદ અપાવી દીધી છે. તે સમયે ગાઇડેડ-મિસાઇલ ફ્રિગેટ INS ગોદાવરી અને પાકિસ્તાની ફ્રિગેટ PNS બાબર વચ્ચે આવો જ ભયાનક મુકાબલો થયો હતો. ચાંચિયાગીરી વિરોધી કામગીરી દરમિયાન પીએનએસ બાબર અસુરક્ષિત ગતિએ આવીને INS ગોદાવરીના ફ્લાઇટ ડેક સાથે ટકરાયું હતું અને તેના હેલિકોપ્ટરની સુરક્ષા જાળી તોડી નાખી હતી. તે સમયે પણ બંને દેશો વચ્ચે ઉગ્ર શબ્દયુદ્ધ ખેલાયું હતું.

દ્વિપક્ષીય સલામતી પ્રોટોકોલના ધજાગરા
૧૯૯૧ના દ્વિપક્ષીય લશ્કરી કરારની કલમ ૧૦ મુજબ, આંતરરાષ્ટ્રીય પાણીમાં બંને દેશોના નૌકાદળના જહાજોએ અકસ્માત ટાળવા માટે ઓછામાં ઓછું ૩ નોટિકલ માઇલ (લગભગ ૫.૬ કિમી) નું સલામત અંતર જાળવવું ફરજિયાત છે. ૨૦૧૧ અને ૨૦૨૬ બંને ઘટનાઓમાં પાકિસ્તાને આ આંતરરાષ્ટ્રીય નિયમોનું ખુલ્લેઆમ ઉલ્લંઘન કર્યું છે, જેના કારણે અરબી સમુદ્રમાં ફરી એકવાર યુદ્ધ જેવા તણાવના વાદળો ઘેરાયા છે.