તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
હાઈ-પ્રોફાઈલ દાણચોરી - ડ્રગ્સ હેરાફેરીમાં મહિલાઓની સંડોવણી વધી
બેંગ્લોર-મુંબઈ-અમદાવાદ-સુરત એરપોર્ટ પર સાત મોટા કેસમાં મહિલાઓ ઝડપાઈ : દેશના મુખ્ય એરપોર્ટ પર દાણચોરી અને ડ્રગ્સ સામેની કાર્યવાહી વધુ કડક બની રહી છે
મુંબઈ તા.૧૮: વર્ષો પહેલા રિલીઝ થયેલી સંજય દત્ત અને શ્રીદેવીની ફિલ્મ ગુમરાહમાં જે રીતે શ્રીદેવીને ડ્રગ્સની હેરાફેરી કેસમાં ખોટી રીતે ફસાવી દેવામાં આવે છે તેવી રીતે પોતાને ડ્રગ્સના ખોટા કેસમાં એક મિત્રએ ફસાવી દીધી છે આવો દાવો મોડેલ હર્ષા સોનીએ મુંબઈ એરપોર્ટ પર કર્યો હતો. હર્ષા સોની થાઈલેન્ડથી મુંબઈ આવતી વખતે એરપોર્ટ પર ૧૧.૮૨ કરોડના હાઇબ્રિડ ગાંજા સાથે ઝડપાઈ ગઈ છે. આ તો થઈ એક મહિલાની વાત પરંતુ છેલ્લા ઘણા સમયથી સ્મગલિગ અને ડ્રગ્સની હેરાફેરીમાં મહિલાઓની સંડોવણી સતત વધી રહી હોવાનું સેન્ટ્રલ એજન્સીઓના ધ્યાનમાં આવ્યું છે
દેશના મુખ્ય તમામ એરપોર્ટ પર છેલ્લા બે વર્ષ દરમિયાન પકડાયેલા હાઈ-પ્રોફાઈલ દાણચોરી અને ડ્રગ્સ હેરાફેરીના કેસોમાં મહિલાઓની સંડોવણી વધી રહી હોવાની વાત સામે આવી છે. વર્ષ ૨૦૨૪થી ૨૦૨૬ દરમિયાન બેંગ્લોર, મુંબઈ, અમદાવાદ અને સુરત એરપોર્ટ પર નોંધાયેલા મોટા કેસોમાં મહિલાઓ ઝડપાઈ છે.
કસ્ટમ્સની ઓફિસ ખાતેથી જાણવા મળતી માહિતી મુજબ વર્ષ ૨૦૨૫માં દેશભરમાં ચર્ચાસ્પદ બનેલા કેસમાં પૂર્વ ડીજીપીની પુત્રી રાનિયા રાવની દુબઈથી બેંગ્લોર પહોંચ્યા બાદ DRI દ્વારા અટકાયત કરવામાં આવી હતી. તેની પાસેથી ૧૪.૨ કિલોગ્રામ સોનું મળી આવ્યું હતું, જેની તે વખતે બજાર કિમત આશરે ૧૨.૩૬ કરોડ હોવાનું બહાર આવ્યું હતું.
અમદાવાદ એરપોર્ટ પર જુલાઈ ૨૦૨૫માં અબુધાબીથી આવેલી મહિલા પેસેન્જર રસીદા પાસેથી ૧૨ કરોડ કિમતની રિચાર્ડ મિલે બ્રાન્ડની લક્ઝરી ઘડિયાળ જપ્ત કરવામાં આવી હતી. ત્યારબાદ નવેમ્બર ૨૦૨૫માં ૧૭ લાખની રોલેક્સ ઘડિયાળ સાથે એક મહિલા અને અન્ય પેસેન્જરની પણ અટકાયત કરવામાં આવી હતી.સપ્ટેમ્બર ૨૦૨૫માં મુંબઈની હિમાની નામની યુવતી અમદાવાદ એરપોર્ટ પર ૪૩ લાખના આઈફોન સાથે ઝડપાઈ હતી. તપાસ દરમિયાન વિદેશ પ્રવાસના બહાને અંદાજે એક કરોડ રૂપિયાના આઈફોનની હેરાફેરી કર્યાનું પણ સામે આવ્યું હતું.
જેદ્દાહથી અમદાવાદ આવેલી પાલનપુરની ચાર મહિલા પેસેન્જર પાસેથી ૧.૫૩ કરોડના સોનાના દાગીના મળી આવ્યા હતા. આ કેસમાં પાલનપુરના ટૂર્સ એન્ડ ટ્રાવેલ્સના સંચાલકની પણ ધરપકડ કરવામાં આવી હતી.સુરત એરપોર્ટ પર સપ્ટેમ્બર ૨૦૨૫માં દુબઈથી આવેલી એક મહિલા અને તેના સાથી મુસાફર પાસેથી આશરે ૨૫ કરોડના ગોલ્ડ બિસ્કિટ જપ્ત કરવામાં આવ્યા હતા.
તાજેતરમાં ૧૨ જૂન ૨૦૨૬ના રોજ મુંબઈ એરપોર્ટ પર એર ઇન્ડિયાની ફલાઇટ મારફતે થાઈલેન્ડથી આવેલી મોડલ અને બ્યુટી પેજન્ટ રનર-અપ હર્ષા સોનીની કસ્ટમ વિભાગે અટકાયત કરી હતી. તેની પાસેથી ૧૧.૮૨ કરોડની કિમતનો હાઈબ્રિડ ગાંજો મળી આવ્યો હોવાનું તપાસમાં બહાર આવ્યું હતું. આ કેસમાં એનડીપીએસ એક્ટ હેઠળ કાર્યવાહી હાથ ધરવામાં આવી છે.કસ્ટમ વિભાગના સિનિયર અધિકારીઓના જણાવ્યા મુજબ, છેલ્લા બે વર્ષમાં સામે આવેલા સાત મોટા હાઈ-પ્રોફાઈલ કેસોએ એક વાત સ્પષ્ટ કરી છે કે સેલિબ્રિટી, મોડલ કે VIP પેસેન્જર હોવાનો કોઈ વિશેષ લાભ કે તપાસની અસર થાય તેવી સુવિધા આપવામાં આવતી નથી. દરેક મુસાફરના સામાનનું સ્કેનિગ, પ્રોફાઇલિગ અને જરૂરી હોય ત્યારે સઘન ચેકિંગ કરવામાં આવે છે.
અધિકારીઓના જણાવ્યા મુજબ, ‘‘મને કોઈએ પાર્સલ આપ્યું હતું'', ‘‘મને સામાન અંગે જાણ નહોતી'' જેવા દાવાઓ તપાસ દરમિયાન ધ્યાનમાં લેવામાં આવતા નથી. દાણચોરી,મોંઘી ઘડિયાળ,ઇલેક્ટ્રોનિક્સ અથવા પ્રતિબંધિત ડ્રગ્સના કેસોમાં કાયદા મુજબ જ કાર્યવાહી કરવામાં આવે છે.આમ, રાનિયા રાવ, રસીદા કૌશર, હિમાની સોલંકી, પાલનપુરની ચાર મહિલાઓ અને મોડલ હર્ષા સોની સહિતના કેસોએ દર્શાવ્યું છે કે દેશના મુખ્ય એરપોર્ટ પર દાણચોરી અને ડ્રગ્સ સામેની કાર્યવાહી વધુ કડક બની રહી છે.
(10:09 AM IST)
છેલ્લા 8 દિવસમાં સૌથી લોકપ્રિય 
