નૈરોબી : આફ્રિકન ખંડના બે પાડોશી દેશો કેન્યા અને સોમાલિયા વચ્ચે એક મોટો આંતરરાષ્ટ્રીય રાજદ્વારી વિવાદ સામે આવ્યો છે. કેન્યાના ઇમિગ્રેશન અધિકારીઓએ એક અત્યંત ચોંકાવનારી કાર્યવાહી કરીને સોમાલિયાના બીજા નાયબ વડાપ્રધાન (Second Deputy Prime Minister) જિબ્રિલ અબ્દિરાશીદ હાજીને નૈરોબી એરપોર્ટ પરથી જ અટકાવીને તેમના પોતાના દેશમાં પાછા ધકેલી (Deport) દીધા છે. સોમાલી સરકારના આ ટોચના નેતા પર છેતરપિંડી અને ખોટી વિગતો રજૂ કરીને ગેરકાયદેસર રીતે કેન્યાનો પાસપોર્ટ મેળવવાનો ગંભીર આક્ષેપ મૂકવામાં આવ્યો છે.

રાજદ્વારી વિઝા સાથે આવ્યા અને ભેરવાઈ ગયા!

રોઇટર્સ અને સ્થાનિક પોલીસ રિપોર્ટના આધારે મળતી વિગતો મુજબ, સોમાલિયાના ડેપ્યુટી પીએમ જિબ્રિલ હાજી બુધવારે બપોરે સોમાલિયાના સત્તાવાર રાજદ્વારી પાસપોર્ટ અને માન્ય કેન્યાઈ વિઝા સાથે નૈરોબીના જોમો કેન્યાટ્ટા આંતરરાષ્ટ્રીય એરપોર્ટ પર લેન્ડ થયા હતા. એરપોર્ટ પર જ્યારે નિયમિત ઇમિગ્રેશન અને સુરક્ષા તપાસ ચાલી રહી હતી, ત્યારે અધિકારીઓની બાજ નજરે પકડી પાડ્યું કે આ હાઈ-પ્રોફાઈલ નેતાએ ભૂતકાળમાં શંકાસ્પદ સંજોગોમાં કેન્યાનું નાગરિકત્વ અને કેન્યાઈ પાસપોર્ટ પણ મેળવી રાખ્યો છે, જે કાયદાકીય રીતે ગુનો બને છે.

તપાસમાં સહકાર આપવાનો ઇનકાર, કોર્ટનો રાગ આલાપ્યો:

એરપોર્ટ પર બનેલી આ ઘટના બાદ ઇમિગ્રેશન વિભાગના રૂમમાં હાઈ-વોલ્ટેજ ડ્રામા સર્જાયો હતો:

·         ગુનો સ્વીકાર્યો પણ પાસપોર્ટ ન આપ્યો: પોલીસ રિપોર્ટ અનુસાર, જ્યારે અધિકારીઓએ સઘન પૂછપરછ કરી ત્યારે ડેપ્યુટી પીએમ હાજીએ સ્વીકાર્યું હતું કે તેમની પાસે કેન્યાનો પાસપોર્ટ છે. પરંતુ જ્યારે તેને રજૂ કરવાનું કહેવામાં આવ્યું, ત્યારે તેમણે તે આપવાનો સ્પષ્ટ ઇનકાર કરી દીધો હતો.

·         કોર્ટમાં જ બતાવીશ: સોમાલી નેતાએ એવો દાવો કર્યો હતો કે તેઓ આ પાસપોર્ટ માત્ર કાયદાની અદાલત (Court of Law) સમક્ષ જ રજૂ કરી શકે છે, એરપોર્ટ અધિકારીઓને નહીં.

વીઆઈપી લાઉન્જમાં કેદ રાખીને વહેલી સવારે કર્યા દેશનિકાલ

ડેપ્યુટી પીએમની આ આડાઈ અને અસહકારને પગલે કેન્યાના ઉચ્ચ સત્તાધીશોએ કડક વલણ અપનાવ્યું હતું. તેમને એરપોર્ટની બહાર જવા દેવાને બદલે તાત્કાલિક કસ્ટડી જેવા વાતાવરણમાં એરપોર્ટના જ VIP લાઉન્જમાં નજરકેદ રાખવામાં આવ્યા હતા. ત્યારબાદ સરકારી આદેશ છૂટતાં જ તેમની મોગાદિશુ (સોમાલિયાની રાજધાની) ની રિટર્ન ટિકિટ બુક કરવામાં આવી હતી અને ગુરુવારે વહેલી સવારે ઉડાન ભરેલી ફ્લાઇટમાં બેસાડીને સત્તાવાર રીતે ડિપોર્ટ કરી દેવાયા હતા.

ઉલ્લેખનીય છે કે કેન્યામાં મોટી સંખ્યામાં સોમાલી ડાયસ્પોરા (સ્થળાંતરિત નાગરિકો) વસે છે અને કેન્યા લાંબા સમયથી સોમાલિયામાં શાંતિ રક્ષા મિશન માટે પોતાના સૈનિકો મોકલીને પ્રાદેશિક સુરક્ષામાં મોટી ભૂમિકા ભજવી રહ્યું છે. આવા સમયે સોમાલિયાના આટલા મોટા ગજાના નેતાના ફેક પાસપોર્ટ કૌભાંડે બંને દેશોના સંબંધોમાં ભારે ખટાશ લાવી દીધી છે.