મુંબઈ: વર્ષ 2008ના ભયાનક મુંબઈ આતંકવાદી હુમલાના કેસમાં નિર્દોષ છૂટેલા આરોપીઓ પૈકીના એક, ફહીમ અર્શદ મોહમ્મદ યુસુફ અંસારીને બોમ્બે હાઈકોર્ટ તરફથી મોટો આંચકો લાગ્યો છે. ફહીમ અંસારીએ વ્યવસાયિક રીતે રિક્ષા કે ટેક્સી ચલાવવા માટે જરૂરી 'પબ્લિક સર્વિસ વ્હીકલ' (PSV) બેજ મેળવવા માટે પોલીસ ક્લિયરન્સ સર્ટિફિકેટ (PCC) ની માંગણી કરતી અરજી કરી હતી, જેને હાઈકોર્ટે આજે ફગાવી દીધી છે. જસ્ટિસ એ.એસ. ગડકરી અને જસ્ટિસ આર.આર. ભોસલેની ખંડપીઠે સુરક્ષાના કારણોને મુખ્ય ગણાવ્યા છે.
આ કેસની વિગતો મુજબ, ફહીમ અંસારીએ આજીવિકા કમાવવા માટે ડ્રાઈવિંગ લાયસન્સ મેળવવા પ્રયાસ કર્યો હતો, પરંતુ મુંબઈ પોલીસે તેની સામે પ્રતિકૂળ રિપોર્ટ આપ્યો હતો. પોલીસે અહેવાલમાં જણાવ્યું હતું કે અંસારીના પ્રતિબંધિત સંગઠન લશ્કર-એ-તૈયબા (LeT) સાથેના કથિત સંબંધો હોવાની આશંકા છે. મહારાષ્ટ્ર સરકારે કોર્ટ સમક્ષ એક 'કોન્ફિડેન્શિયલ' (ગુપ્ત) રિપોર્ટ પણ રજૂ કર્યો હતો અને આ મામલે ઇન-ચેમ્બર સુનાવણી કરવા વિનંતી કરી હતી, કારણ કે તેની વિગતો જાહેર કરવી રાષ્ટ્રીય સુરક્ષા માટે જોખમી બની શકે છે.
હાઈકોર્ટે પોતાનો ચુકાદો આપતા સ્પષ્ટ કર્યું કે, આ કેસના વિશિષ્ટ તથ્યો અને જાહેર સુરક્ષાના ગંભીર પ્રશ્નને જોતા, સત્તાવાળાઓએ તેને પોલીસ ક્લિયરન્સ સર્ટિફિકેટ આપવાનો જે ઈનકાર કર્યો છે તે સંપૂર્ણપણે યોગ્ય છે. કોર્ટે વધુમાં ઉમેર્યું કે, જાહેર જનતાની સુરક્ષા સાથે કોઈ પણ પ્રકારની બાંધછોડ કરી શકાય નહીં. સરકારી વકીલે કોર્ટમાં દલીલ કરી હતી કે અંસારી એવા કોઈ પણ વ્યવસાય કે નોકરી કરવા માટે સ્વતંત્ર છે જેમાં પોલીસ વેરિફિકેશન કે ક્લિયરન્સની જરૂર પડતી નથી.
નોંધનીય છે કે ફહીમ અંસારી પર પાકિસ્તાની આતંકી અજમલ કસાબ સાથે મળીને 26/11 ના હુમલાનું કાવતરું ઘડવાનો આરોપ હતો, પરંતુ પુરાવાના અભાવે કોર્ટે તેને નિર્દોષ જાહેર કર્યો હતો. જોકે, ઉત્તર પ્રદેશના રામપુર CRPF કેમ્પ પર 2008માં થયેલા હુમલામાં તે દોષિત ઠર્યો હતો અને 10 વર્ષની જેલની સજા કાપી ચૂક્યો છે. સજા પૂરી થયા બાદ તે મુંબઈમાં ડ્રાઈવર તરીકે કામ કરવા માંગતો હતો, પરંતુ હાઈકોર્ટના આ નિર્ણય બાદ હવે તેના માટે કાયદેસર રીતે પેસેન્જર વાહન ચલાવવાના દ્વાર બંધ થઈ ગયા છે.