મુંબઈ, તા.૦૬: દિવાળી અને લોકઆસ્થાના મહાપર્વ છઠ્ઠ પૂજા નિમિત્તે વતને જવા માટે મુંબઈના કુર્લા સ્થિત લોકમાન્ય તિલક ટર્મિનસ (LTT) રેલવે સ્ટેશન પર મોડી રાતથી જ પરપ્રાંતિય મુસાફરોની અભૂતપૂર્વ ભીડ અને લાંબી કતારો જોવા મળી રહી છે, જેને પગલે કોઈ અપ્રિય ઘટના ન ઘટે તે માટે રેલવે પ્રશાસનને હાઈ એલર્ટ પર મૂકવામાં આવ્યું છે.

સ્ટેશન પર અફરાતફરી અને નાસભાગ જેવી સ્થિતિ ટાળવા માટે આરપીએફ અને જીઆરપી દ્વારા વધારાનો બંદોબસ્ત ગોઠવીને મુસાફરોને સીધા પ્લેટફોર્મ પર જવા દેવાને બદલે હોલ્ડિંગ એરિયામાં રોકીને બેચ મુજબ પ્રવેશ આપવામાં આવી રહ્યો છે, તેમજ એઆઈ કેમેરા અને સીસીટીવી દ્વારા સમગ્ર સ્ટેશન પરિસર પર સતત નિરીક્ષણ રાખવામાં આવી રહ્યું છે.

તહેવારો દરમિયાન ઉત્તર ભારત અને બિહાર તરફ જતા રૂટો પર લાંબા વેટિંગ લિસ્ટને ધ્યાનમાં રાખીને ભારતીય રેલવે દ્વારા ગોરખપુર, પટના, છપરા, દરભંગા અને હાવડા જેવા અતિ વ્યસ્ત માર્ગો પર ડઝનબંધ નવી 'ફેસ્ટિવલ સ્પેશિયલ ટ્રેનો' દોડાવવાની મોટી જાહેરાત કરવામાં આવી છે, જેથી કન્ફર્મ ટિકિટ વગર અટવાયેલા લાખો મુસાફરોને મોટી રાહત મળી શકે.

પ્રવાસીઓની સુરક્ષા સુનિશ્ચિત કરવા માટે મુંબઈના સીએસએમટી, એલટીટી, બાંદ્રા, દાદર અને કલ્યાણ સહિત દેશના તમામ મુખ્ય જંકશનો પર ડોગ સ્ક્વોડ અને મેટલ ડિટેક્ટરની મદદથી શંકાસ્પદ વસ્તુઓ અને સામાનનું સઘન ચેકિંગ હાથ ધરવામાં આવી રહ્યું છે.

બીજી તરફ તહેવારોની ખરીદી અને પ્રવાસના ધસારાને કારણે દિલ્હી, નોઈડા, ગુરુગ્રામ અને ગાઝિયાબાદ જેવા એનસીઆર વિસ્તારોના મુખ્ય માર્ગો પર વાહનોની લાંબી લાઈનો લાગતા કલાકો સુધી ભારે ટ્રાફિક જામની સમસ્યા સર્જાઈ હતી.
 

રેલવે અધિકારીઓએ નાગરિકોને અફવાઓથી દૂર રહેવા અને નિયમિત સુરક્ષા સૂચનાઓનું પાલન કરીને તહેવારોમાં સલામત પ્રવાસ કરવા માટે અપીલ કરી છે.