બર્લિન :યુરોપના મધ્ય અને ઉત્તરીય ભાગો હાલમાં ઇતિહાસના સૌથી ગંભીર ગરમીના મોજાની ઝપેટમાં છે, જેના કારણે ૨૦ કરોડથી વધુ લોકો પ્રભાવિત થયા છે. આત્યંતિક તાપમાનને લીધે હોસ્પિટલોમાં દર્દીઓની સંખ્યા વધી છે, પરિવહન વ્યવસ્થા ઠપ થઈ ગઈ છે અને જાહેર સેવાઓ પર ગંભીર અસર પડી છે. ડેનમાર્ક, જર્મની અને ચેક રિપબ્લિક જેવા દેશોમાં પારો ઐતિહાસિક સ્તરે પહોંચી જવાથી જનજીવન અસ્તવ્યસ્ત બન્યું છે.
કેટલાક દેશોમાં તાપમાનના સર્વકાલીન રેકોર્ડ તૂટ્યા છે; ડેનમાર્કમાં ૧૮૭૪ પછીનું સૌથી ઊંચું ૩૭°C તાપમાન નોંધાયું છે, જ્યારે ચેક રિપબ્લિકમાં ડોક્સાની ખાતે પારો ૪૦°C ને પાર કરી ગયો છે. સ્વિટ્ઝર્લૅન્ડના બાસેલમાં પણ ૩૮.૮°C તાપમાન નોંધાતા સ્થાનિક તંત્ર એલર્ટ મોડ પર આવી ગયું છે. વૈજ્ઞાનિકો આ આત્યંતિક ગરમી માટે સીધી રીતે આબોહવા પરિવર્તનને જવાબદાર ઠેરવી રહ્યા છે અને આવી ઘટનાઓ ભવિષ્યમાં વધુ વારંવાર બનવાની ચેતવણી આપી રહ્યા છે.
આ ગરમીના મોજાથી માત્ર લોકોનું સ્વાસ્થ્ય જ નહીં પરંતુ ઈન્ફ્રાસ્ટ્રક્ચર પણ જોખમમાં મુકાયું છે. રોડ-રસ્તાઓ અને રેલવે લાઈનો પર ગરમીની અસરને કારણે પરિવહનમાં ભારે વિક્ષેપ જોવા મળી રહ્યો છે. તબીબી ક્ષેત્રે હોસ્પિટલોમાં ગરમી સંબંધિત બીમારીઓથી પીડાતા દર્દીઓનો ધસારો વધતા વહીવટી તંત્ર પર દબાણ વધ્યું છે. સરકારો દ્વારા લોકોને પૂરતા પ્રમાણમાં પાણી પીવા અને કામ વગર ઘરની બહાર ન નીકળવાની સલાહ આપવામાં આવી છે.
ભૂતકાળની સરખામણીએ આ ગરમીની તીવ્રતા દર્શાવે છે કે આબોહવા પરિવર્તન હવે માત્ર ચર્ચાનો વિષય નથી, પરંતુ એક વાસ્તવિક આપત્તિ બની ગયું છે. આગામી દિવસોમાં ગરમીનું જોર ઘટવાની અપેક્ષા છે, પરંતુ આ ઘટનાએ યુરોપિયન દેશોને તેમના ડિઝાસ્ટર મેનેજમેન્ટ પ્લાન અને ઇન્ફ્રાસ્ટ્રક્ચરમાં સુધારો કરવા માટે મજબૂર કર્યા છે. લાંબા ગાળે આ પ્રકારના તાપમાન સામે લડવા માટે યુરોપિયન રાષ્ટ્રોએ સંયુક્ત આબોહવા નીતિઓ અપનાવવી અનિવાર્ય બની રહેશે.