બેંગલુરુ : કર્ણાટકના રાયચુર જિલ્લામાંથી માનવતા શર્મસાર થાય અને કાળજું કંપાવી દે તેવી અત્યંત દિલધડક ઘટના પ્રકાશમાં આવી છે. સિંધનુર પેટા-જિલ્લા હેઠળ આવેલા RH કેમ્પ-૫ વિસ્તારના એક નિર્જન ખેતરમાંથી ૨૫ વર્ષીય યુવતીનો લોહીલુહાણ હાલતમાં દેહ મળી આવ્યો હતો. પ્રાથમિક દ્રષ્ટિએ આશાસ્પદ યુવતી પર ભારે પથ્થર વડે હુમલો કરીને તેની નિર્દયતાપૂર્વક હત્યા કરવામાં આવી હોવાનું સામે આવ્યું છે. હુમલાખોરે હત્યા કર્યા બાદ તેની દોઢ વર્ષની માસૂમ બાળકીને માતાના રક્તરંજિત મૃતદેહ પર જ મૂકીને ફરાર થઈ ગયો હતો.

મૃતક મહિલાની ઓળખ નજીકના RH કેમ્પ-૪ ખાતે રહેતી સ્નેહા તરીકે થઈ છે. જ્યારે સ્થાનિક ગામજનો ખેતર પાસેથી પસાર થઈ રહ્યા હતા ત્યારે નાની બાળકી પોતાની મૃતપ્રાય માતાને વળગીને કરૂણ આક્રંદ કરી રહી હતી. આ દ્રશ્ય જોઈને ગ્રામજનો ચોંકી ઉઠ્યા હતા અને તાત્કાલિક સ્થાનિક સિંધનુર ગ્રામીણ પોલીસને જાણ કરી હતી. પોલીસ ટીમે ઘટનાસ્થળે પહોંચી ત્યારે સ્નેહાના શ્વાસ ચાલી રહ્યા હતા, જોકે હોસ્પિટલ પહોંચાડ્યા બાદ સારવાર દરમિયાન તેણે દમ તોડ્યો હતો.

ચાર વર્ષ પહેલાં થયા હતા લગ્ન, પ્રેમ પ્રકરણમાં હત્યાની આશંકા

સિંધનુર ગ્રામીણ પોલીસે આ ચર્ચિત હત્યાકાંડના સગડ મેળવીને સ્નેહાના પતિ અમિત તેમજ તેની સાથે કથિત રીતે લગ્નેતર સંબંધ ધરાવતા શુભમ નામના અન્ય એક યુવકની અટકાયત કરી લીધી છે. તપાસમાં સામે આવ્યું છે કે સ્નેહાના લગ્ન ચાર વર્ષ અગાઉ અમિત સાથે થયા હતા, પરંતુ છેલ્લા ચાર મહિનાથી તે શુભમ સાથે સંપર્કમાં હતી. આ ત્રિપોક્સ સંબંધો અને ગૃહકલેશના કારણે જ આ નિર્મમ હત્યાકાંડ ખેલાયો હોવાની આશંકા વચ્ચે પોલીસ બંને શંકાસ્પદોની સઘન પૂછપરછ કરી રહી છે. હાલ મૃતદેહને પોસ્ટમોર્ટમ અર્થે તાલુકા હોસ્પિટલમાં મોકલી કાયદેસરની કાર્યવાહી તેજ કરવામાં આવી છે.