મુંબઈ: હૃદય રોગના મુખ્ય કારણ ગણાતા 'બેડ કોલેસ્ટ્રોલ' (ખરાબ ચરબી) ને નિયંત્રિત કરવા માટે IIT બોમ્બેના વૈજ્ઞાનિકોએ એક એવો માર્ગ શોધી કાઢ્યો છે જે ભવિષ્યની તબીબી દુનિયાને સંપૂર્ણપણે બદલી શકે છે. સંશોધકોએ શોધી કાઢ્યું છે કે 'KTDP' નામનો એક નાનો પેપ્ટાઇડ (પ્રોટીનનો ભાગ) લિવરમાંથી લોહીના પ્રવાહમાં ભળતા હાનિકારક વેરી લો-ડેન્સિટી લિપોપ્રોટીન (VLDL) એટલે કે ખરાબ કોલેસ્ટ્રોલને રસ્તામાં જ અટકાવી દે છે. આ પદ્ધતિ પ્રચલિત દવાઓ કરતાં તદ્દન અલગ છે, કારણ કે તે લિવરમાં કોલેસ્ટ્રોલ બનાવવાની પ્રક્રિયાને નુકસાન પહોંચાડ્યા વિના માત્ર તેના પરિવહનને ટાર્ગેટ કરે છે.

સામાન્ય રીતે જ્યારે શરીરમાં ચરબીના વહનને રોકવામાં આવે, ત્યારે તે લિવરમાં જમા થઈને 'ફેટી લિવર' જેવી ગંભીર સમસ્યાઓ ઊભી કરે છે. જોકે, આ પ્રયોગમાં વૈજ્ઞાનિકોને સૌથી મોટી સફળતા એ મળી છે કે આ અટકેલી ચરબી લિવરને નુકસાન કરવાને બદલે શરીરના કોષોમાં ઓગળીને સીધી ઊર્જામાં રૂપાંતરિત થઈ જાય છે. લેબોરેટરીમાં ઉંદર અને ઝેબ્રાફિશ પર કરવામાં આવેલા પ્રી-ક્લિનિકલ ટ્રાયલ્સ દરમિયાન કોઈપણ આડઅસર વિના કોલેસ્ટ્રોલ અને ટ્રાઇગ્લિસરાઇડના સ્તરમાં સીધો 50 ટકા સુધીનો જંગી ઘટાડો નોંધાયો છે.

જો કે આ સંશોધન હજુ તેના પ્રારંભિક તબક્કામાં છે અને માનવ શરીર પર તેના ક્લિનિકલ ટ્રાયલ્સ થવાના બાકી છે, તેમ છતાં તેને હૃદય રોગની સારવારમાં એક મોટી ક્રાંતિ માનવામાં આવી રહી છે. હાલમાં કોલેસ્ટ્રોલ માટે વપરાતી સ્ટેટિન્સ જેવી દવાઓ સ્નાયુઓનો દુખાવો અને અન્ય આડઅસરો પેદા કરે છે, જેની સામે IIT બોમ્બેની આ નવી ટેકનોલોજી ભવિષ્યમાં વધુ ચોક્કસ, સુરક્ષિત અને કુદરતી વિકલ્પ પૂરો પાડશે. વૈજ્ઞાનિકોના મતે, આ નવીન પદ્ધતિની સાથે સ્વસ્થ જીવનશૈલી અપનાવવાથી હાર્ટ એટેકના ખતરાને બહુ વહેલા સર અટકાવી શકાશે.