પાકિસ્તાન હાલમાં ગંભીર સ્વાસ્થ્ય સંકટનો સામનો કરી રહ્યું છે. કેન્સર અને હૃદયરોગ જેવી ગંભીર બીમારીઓની સારવાર માટેની 105 મહત્વપૂર્ણ દવાઓ બજારમાંથી ગાયબ થઈ ગઈ છે અથવા તેની ભારે અછત વર્તાઈ રહી છે. દવાઓની કિંમતો વધારવામાં થઈ રહેલા વિલંબને કારણે દવા ઉત્પાદકોએ કાં તો ઉત્પાદન બંધ કરી દીધું છે અથવા તો ઘટાડી દીધું છે, જેની સીધી અસર દર્દીઓના જીવ પર પડી રહી છે.

આ કટોકટીનું મુખ્ય કારણ દવાઓની કિંમતો નક્કી કરવામાં થતી અતિશય વિલંબ છે. ડ્રગ રેગ્યુલેટરી ઓથોરિટી ઓફ પાકિસ્તાન (DRAP) ની ડ્રગ પ્રાઈસિંગ કમિટીએ ફેબ્રુઆરી 2024માં જ 105 'હાર્ડશિપ-કેટેગરી'ની દવાઓની કિંમતો સુધારવા માટે સરકારને ફાઈલ મોકલી હતી, પરંતુ સંઘીય કેબિનેટ દ્વારા હજુ સુધી કોઈ નિર્ણય લેવામાં આવ્યો નથી.
ઉત્પાદકોનું કહેવું છે કે કાચો માલ, પેકેજિંગ, લેબર અને ટ્રાન્સપોર્ટેશનના વધતા ખર્ચ તેમજ ચલણના અવમૂલ્યનને કારણે જૂના ભાવે દવાઓનું ઉત્પાદન કરવું તેમના માટે ખોટનો સોદો બની ગયું છે.
પાકિસ્તાન કેમિસ્ટ્સ એન્ડ ડ્રગિસ્ટ્સ એસોસિએશન (PCDA) એ ચેતવણી આપી છે કે અસલી દવાઓની અછતનો ફાયદો ઉઠાવીને બજારમાં નકલી અને હલકી ગુણવત્તાની દવાઓ વેચનારા સક્રિય થઈ ગયા છે. લાચાર દર્દીઓ જીવ બચાવવા માટે ગમે ત્યાંથી દવાઓ મેળવવા મજબૂર બન્યા છે, જેના કારણે નકલી દવાઓ સપ્લાય ચેઈનમાં ઘૂસવાનું જોખમ અનેકગણું વધી ગયું છે.
બજારમાંથી ગાયબ થયેલી દવાઓમાં નીચે મુજબની મુખ્ય દવાઓનો સમાવેશ થાય છે:કેન્સરની દવાઓ: કીમોથેરાપી માટે વપરાતી સિસપ્લેટિન, કાર્બોપ્લેટિન અને ડોક્સોરુબિસિન.હૃદયરોગની દવાઓ: સ્ટ્રેપ્ટોકાઈનેઝ ઈન્જેક્શન અને ડિગોક્સિન લિક્વિડ (બાળકો માટે).અન્ય: મોર્ફિન કેપ્સ્યુલ (ગંભીર દુખાવા માટે), પિલોકાર્પિન આઈ ડ્રોપ્સ, યલો ફીવર વેક્સિન અને ફોલિક એસિડ ટેબ્લેટ્સ.