નવી દિલ્હી :  આજના આર્ટિફિશિયલ ઈન્ટેલિજન્સ (AI) ના યુગમાં કામ કરવાની પદ્ધતિઓ અને જરૂરિયાતો એટલી ઝડપથી બદલાઈ રહી છે કે પરંપરાગત ડિગ્રીઓના અસ્તિત્વ સામે પ્રશ્નો ઉઠી રહ્યા છે. દર વર્ષે લાખો વિદ્યાર્થીઓ બેચલર ઓફ આર્ટ્સ (BA) ની ડિગ્રી મેળવે છે, પરંતુ બદલાતા સમય સાથે માત્ર ડિગ્રીના આધારે નોકરી મેળવવી પડકારજનક બની છે. આંકડા દર્શાવે છે કે આશરે 40 ટકા કંપનીઓ હવે માત્ર સૈદ્ધાંતિક જ્ઞાન ધરાવતા ઉમેદવારોને બદલે 'હાઇબ્રિડ સ્કિલ્સ' ધરાવતા યુવાનોને પ્રાથમિકતા આપે છે, જેઓ પોતાની ડિગ્રીની સાથે AI ટૂલ્સનો અસરકારક ઉપયોગ કરી જાણતા હોય.

પરંપરાગત ડિગ્રી ક્યારેય વ્યર્થ નથી હોતી, બસ અભિગમ બદલવાની જરૂર છે!

નિષ્ણાતોનું માનવું છે કે BA ની ડિગ્રી નકામી નથી, પરંતુ હવે તેના પરંપરાગત સ્વરૂપમાં ફેરફાર કરવાની અનિવાર્યતા છે. આજના કોર્પોરેટ જગતમાં માત્ર ગોખણપટ્ટી કે થિયરી કામ લાગતી નથી. કંપનીઓ એવી પ્રતિભાની શોધમાં છે જે પોતાની વિષય નિષ્ણાતતા (Domain Expertise) સાથે આધુનિક ટેકનોલોજીનો ઉપયોગ કરીને સર્જનાત્મક પરિણામો આપી શકે. જો તમે આર્ટ્સના વિદ્યાર્થી હોવ, તો તમારે માત્ર પુસ્તકીયું જ્ઞાન મેળવવાને બદલે લાઈવ પ્રોજેક્ટ્સ પર કામ કરવાની અને નવી સોફ્ટવેર ટેકનોલોજી શીખવાની તૈયારી રાખવી પડશે.

કરિયરને નવી દિશા આપવા માટે આ 5 પગલાં છે અનિવાર્ય:

·         સ્કિલ ડેવલપમેન્ટ: ડિગ્રીના પહેલા કે બીજા વર્ષથી જ વધારાની સ્કિલ્સ શીખવાનું શરૂ કરો.

·         AI ટૂલ્સમાં નિપુણતા: તમારી ફિલ્ડને લગતા AI ટૂલ્સ (જેમ કે કન્ટેન્ટ રાઈટિંગ, ડેટા એનાલિસિસ કે ડિઝાઈનિંગ AI) નો ઉપયોગ કરતા શીખો.

·         પ્રેક્ટિકલ પ્રોજેક્ટ્સ: માત્ર પ્રેઝન્ટેશન નહીં, પણ સાચા અર્થમાં વેબસાઈટ કે સોફ્ટવેર ડેવલપમેન્ટ જેવા પ્રેક્ટિકલ પ્રોજેક્ટ્સ પર કામ કરો.

·         ઈન્ટર્નશિપ: સ્થાનિક વ્યવસાયોની સમસ્યાઓ ઉકેલવા માટે ઈન્ટર્નશિપ કરો, જેથી વાસ્તવિક માર્કેટની જરૂરિયાતો સમજી શકાય.

·         પ્રોડક્ટિવિટી વધારવી: AI નો ઉપયોગ કરીને તમારી ઉત્પાદકતા (Productivity) વધારો. જે કામ કરવામાં સામાન્ય વ્યક્તિને કલાકો લાગે, તે AI ની મદદથી તમે મિનિટોમાં કરી શકો, તે તમારી સૌથી મોટી તાકાત બનશે.

આગામી 3 થી 5 વર્ષ સુધી ડિગ્રી તો અનિવાર્ય રહેશે જ, પરંતુ ભવિષ્યમાં માત્ર ડિગ્રી નહીં, પણ તમારી 'સ્કિલ' અને 'પ્રેક્ટિકલ કામ' જ તમને નોકરી અપાવશે. તેથી, સમયની સાથે કદમ મિલાવો અને ડિગ્રીની સાથે આધુનિક ટેકનોલોજીનું શસ્ત્ર ધારણ કરો, કારણ કે ભવિષ્ય એવા લોકોનું છે જેઓ ટેકનોલોજીથી ડરવાને બદલે તેને પોતાની તાકાત બનાવે છે.