જોહાનિસબર્ગ : વિશ્વ હજુ કોરોનાની અસરમાંથી માંડ બહાર આવ્યું છે ત્યાં દક્ષિણ આફ્રિકામાંથી એક અત્યંત ચિંતાજનક સમાચાર સામે આવ્યા છે. દક્ષિણ આફ્રિકાના આરોગ્ય અધિકારીઓએ બુધવારે પુષ્ટિ કરી છે કે એક ક્રૂઝ શિપ પર ફાટી નીકળેલા આઉટબ્રેક દરમિયાન બે મુસાફરોમાં 'હંટાવાયરસ'નો ખતરનાક 'એન્ડીઝ સ્ટ્રેન' (Andes strain) જોવા મળ્યો છે. આ સ્ટ્રેન એટલો ઘાતક છે કે તે માત્ર ઉંદરોથી જ નહીં પરંતુ માણસથી માણસમાં પણ ફેલાઈ શકે છે.
ક્રૂઝ શિપ પર મોતનું તાંડવ
કેપ વર્ડેના કિનારે ઉભેલા આ ક્રૂઝ શિપ પર અત્યાર સુધીમાં આ વાયરસને કારણે ત્રણ મુસાફરોએ જીવ ગુમાવ્યા છે. અન્ય ચાર લોકો ગંભીર રીતે બીમાર હોવાનું જાણવા મળ્યું છે. દક્ષિણ આફ્રિકાના આરોગ્ય વિભાગના અહેવાલ મુજબ, જ્યારે બીમાર મુસાફરોને શિપ પરથી એરલિફ્ટ કરીને સારવાર માટે દક્ષિણ આફ્રિકા લાવવામાં આવ્યા, ત્યારે તેમના ટેસ્ટ પોઝિટિવ આવ્યા હતા. કમનસીબે, તેમાંથી એક મહિલાનું મોત નીપજ્યું છે અને તેના મૃત્યુ બાદ થયેલા પરીક્ષણમાં વાયરસની પુષ્ટિ થઈ છે.
બ્રિટિશ નાગરિકની હાલત ગંભીર
આ વાયરસની ઝપેટમાં આવેલો એક બ્રિટિશ નાગરિક હાલમાં દક્ષિણ આફ્રિકાની હોસ્પિટલમાં આઈસીયુ (ICU) માં જીવન મરણ વચ્ચે લડી રહ્યો છે. સામાન્ય રીતે હંટાવાયરસ ઉંદરોના મળ-મૂત્ર કે લાળના સંપર્કથી ફેલાતો હોય છે, પરંતુ 'એન્ડીઝ સ્ટ્રેન' માનવ સંપર્ક દ્વારા ફેલાવવાની ક્ષમતા ધરાવતો હોવાથી આરોગ્ય નિષ્ણાતોમાં ચિંતા વધી ગઈ છે. તંત્ર અત્યારે એ જાણવા પ્રયાસ કરી રહ્યું છે કે શિપ પર રહેલા અન્ય મુસાફરો પણ આ ચેપનો શિકાર બન્યા છે કે કેમ.
શું છે આ વાયરસના લક્ષણો?
હંટાવાયરસના ચેપમાં દર્દીને તીવ્ર તાવ, માથાનો દુખાવો, માંસપેશીઓમાં દુખાવો અને શ્વાસ લેવામાં તકલીફ જેવા લક્ષણો જોવા મળે છે. જો સમયસર સારવાર ન મળે તો તે જીવલેણ સાબિત થઈ શકે છે. ક્રૂઝ પર હજુ પણ ત્રણ બીમાર દર્દીઓ ફસાયેલા છે, જેમને ટૂંક સમયમાં સુરક્ષિત રીતે બહાર કાઢવાની યોજના બનાવવામાં આવી રહી છે. હાલમાં આંતરરાષ્ટ્રીય આરોગ્ય સંસ્થાઓ આ આઉટબ્રેક પર ઝીણવટભરી નજર રાખી રહી છે જેથી તેને વધુ ફેલાતો અટકાવી શકાય.