બ્યુનોસ એરેસ, તા.૦૯: દુનિયા હજુ કોરોનાની અસરમાંથી માંડ બહાર આવી છે ત્યાં આર્જેન્ટિનાથી આવેલા હંટાવાયરસના સમાચારે ફરી એકવાર ચિંતા જગાવી છે. આર્જેન્ટિનામાં છેલ્લા એક વર્ષમાં હંટાવાયરસના કેસોમાં લગભગ બમણો વધારો થયો છે. ૨૦૧૮ પછી અત્યાર સુધીમાં ચેપને કારણે ૩૨ લોકોના મોત નોંધાયા છે, જેના કારણે આરોગ્ય અધિકારીઓ દોડતા થયા છે. આ વાયરસ મુખ્યત્વે ચેપગ્રસ્ત ઉંદરોના મળમૂત્રના સંપર્કમાં આવવાથી ફેલાય છે.

ક્રુઝ શિપ ‘એમવી હોન્ડિયસ’ પર મોતનું તાંડવ

આ આંકડાઓ વચ્ચે સૌથી વધુ ચર્ચા ‘એમવી હોન્ડિયસ’ નામના ક્રુઝ જહાજની થઈ રહી છે. આ જહાજ દક્ષિણ આર્જેન્ટિનાના ઉશુઆયા બંદરથી રવાના થયું હતું, પરંતુ તેમાં સવાર એક ડચ દંપતીનું હંટાવાયરસના કારણે મોત નિપજતા જહાજમાં સવાર અન્ય મુસાફરોમાં ફફડાટ ફેલાયો છે. હાલમાં આ જહાજ સ્પેનના કેનેરી ટાપુઓ તરફ જઈ રહ્યું છે, જેને લઈને ત્યાંના સ્થાનિક લોકોમાં ભારે વિરોધ અને ભય જોવા મળી રહ્યો છે.

આબોહવા પરિવર્તન: વાયરસ ફેલાવાનું મુખ્ય કારણ

નિષ્ણાતોના મતે, આબોહવા પરિવર્તન અને જંગલોનો વિનાશ આ રોગના પ્રસાર માટે મુખ્યત્વે જવાબદાર છે. તાપમાનમાં થતા વધારાને કારણે લાંબી પૂંછડીવાળા ઉંદરો (જે આ વાયરસના વાહક છે) હવે નવા વિસ્તારોમાં પણ અનુકૂલન સાધી રહ્યા છે. આર્જેન્ટિનાના આરોગ્ય મંત્રાલયના જણાવ્યા મુજબ, ગત સીઝન કરતા આ વર્ષે કેસોમાં સીધો ૭૭ ટકાનો ઉછાળો જોવા મળ્યો છે. ખાસ કરીને બ્યુનોસ એરેસના મધ્ય પ્રદેશમાં સૌથી વધુ કેસ નોંધાયા છે.

WHO ની સ્પષ્ટતા: “આ કોવિડ નથી”

બીજી તરફ, સોશિયલ મીડિયા પર આ વાયરસને નવી મહામારી ગણાવતા સમાચારો ફેલાતા વિશ્વ આરોગ્ય સંસ્થા (WHO) ના ડિરેક્ટર જનરલ ટેડ્રોસ ઘેબ્રેયસસે પોતે મેદાનમાં આવવું પડ્યું છે. તેમણે ટ્વિટર (X) પર કેનેરી ટાપુના લોકોને સીધો પત્ર લખીને ખાતરી આપી છે કે, “આ બીજો કોવિડ-19 નથી.” તેમણે સમજાવ્યું કે હંટાવાયરસ મનુષ્યથી મનુષ્યમાં ફેલાવાની ક્ષમતા ખૂબ ઓછી ધરાવે છે અને તેના માટે લાંબા સમય સુધી નજીકનો સંપર્ક હોવો જરૂરી છે.

સુરક્ષાના આકરા પગલાં

સ્પેનના વડાપ્રધાન પેડ્રો સાંચેઝે માનવતાના ધોરણે આ જહાજને પોતાના બંદર પર સ્વીકારવાની તૈયારી દર્શાવી છે. જોકે, ટાપુના રહેવાસીઓની સલામતી માટે એક વિશેષ એક્શન પ્લાન તૈયાર કરવામાં આવ્યો છે. હાલમાં જહાજ પર કોઈ લક્ષણો ધરાવતા મુસાફરો નથી, છતાં ઉતારતા પહેલા તમામની કડક તપાસ કરવામાં આવશે. આર્જેન્ટિનાની ટીમો પણ એ તપાસ કરી રહી છે કે મૃતક દંપતી કયા સ્થળોએથી ચેપગ્રસ્ત થયા હતા.

સમગ્ર વિશ્વ અત્યારે આ ‘એમવી હોન્ડિયસ’ જહાજની મુસાફરી અને આર્જેન્ટિનાના બદલાતા હવામાન પર નજર રાખી રહ્યું છે. શું કુદરત સાથેની છેડછાડ આપણને વધુ એક સ્વાસ્થ્ય કટોકટી તરફ ધકેલી રહી છે? તે મોટો સવાલ છે.