બેંગલુરુ : કર્ણાટકની રાજધાની બેંગલુરુમાં એક હાઈ-પ્રોફાઈલ ચોરીની ઘટના સામે આવી છે, જેમાં અમેરિકા સ્થિત એક ભારતીય મહિલા ડોક્ટરે લગ્ન હોલમાંથી અંદાજે ₹1 કરોડની કિંમતના સોનાના દાગીના ગુમાવ્યા છે. આ ઘટના ગયા અઠવાડિયે શહેરના બિદરાહલ્લી વિસ્તારમાં આવેલા એક લક્ઝરી વેડિંગ હોલમાં બની હતી, જેણે લગ્નની ખુશીઓમાં માતમ ફેલાવી દીધો છે.
ભત્રીજાના લગ્નમાં ભારત આવ્યા હતા ડોક્ટર
પીડિત મહિલા ડોક્ટર શિરુવેલ્લા શ્રીદેવી અમેરિકામાં સ્થાયી થયા છે અને ગત ૧૮ એપ્રિલના રોજ તેમના ભત્રીજાના લગ્ન પ્રસંગમાં હાજરી આપવા માટે બેંગલુરુ આવ્યા હતા. તેઓ પોતાની સાથે અંદાજે ૭૨૫ ગ્રામ સોનાના દાગીના લાવ્યા હતા, જેની બજાર કિંમત ૧ કરોડ રૂપિયા જેટલી આંકવામાં આવી છે. લગ્ન દરમિયાન તેઓ શહેરના ગંગાનગર વિસ્તારમાં રહેતા તેમના ભાઈના ઘરે રોકાયા હતા.
લોક કરેલા રૂમમાંથી ઘરેણાં ગાયબ
૨૨ એપ્રિલના રોજ ઓલ્ડ મદ્રાસ રોડ પર આવેલા 'એસડીપી પેલેસ' (SDP Palace) ખાતે લગ્ન સમારોહ યોજાયો હતો. રાત્રે ૭:૩૦ થી ૧૧:૩૦ ના ગાળામાં આ ચોરી થઈ હતી. ડો. શ્રીદેવીએ પોલીસ ફરિયાદમાં જણાવ્યું હતું કે, કેટલાક દાગીના પહેર્યા બાદ બાકીના કિંમતી ઘરેણાં તેમણે લગ્ન હોલના એક રૂમમાં રાખીને તેને લોક કરી દીધું હતું. જોકે, જ્યારે તેઓ પરત ફર્યા ત્યારે રૂમમાંથી કરોડોના દાગીના ગાયબ હતા.
સ્થાનિક કામદાર પર શંકાની સોય
ડોક્ટરે પોલીસને આપેલી માહિતી મુજબ, જ્યારે તેઓ તૈયાર થઈ રહ્યા હતા ત્યારે તેમણે લગ્ન હોલના એક ઘરેલું કામદારને તે રૂમમાં પ્રવેશતા જોયો હતો. આ શંકાના આધારે અવલાહલ્લી પોલીસે ગુનો નોંધીને તપાસના ચક્રો ગતિમાન કર્યા છે. પોલીસે હોલના સીસીટીવી ફૂટેજ કબજે કર્યા છે અને લગ્ન હોલના સ્ટાફની પૂછપરછ શરૂ કરી છે.
લગ્ન પ્રસંગોમાં વધતી જતી ચોરીની ઘટનાઓને જોતા પોલીસે નાગરિકોને કિંમતી ચીજવસ્તુઓ બાબતે વધુ સાવધ રહેવા અપીલ કરી છે. અમેરિકાથી ખાસ લગ્ન માટે આવેલા ડોક્ટર માટે આ પ્રવાસ અત્યંત દુઃખદ સાબિત થયો છે. હવે જોવાનું એ રહેશે કે બેંગલુરુ પોલીસ આ ચોરીનો ભેદ ઉકેલીને દાગીના પરત મેળવી શકે છે કે નહીં.