ડલાસ (ટેક્સાસ) : અમેરિકાના ટેક્સાસમાં H-1B કામદારોની ભરતીને લઈને એક મોટો વિવાદ છેડાયો છે. જાણીતી ટેક્સાસ યુટ્યુબર અને બ્લેઝ મીડિયાની પત્રકાર સારા ગોન્ઝાલેસે ‘એમ્બુશ ઇન્વેસ્ટિગેટિવ જર્નાલિઝમ’ (અચાનક મુલાકાત લઈને તપાસ કરવી) દ્વારા ભારતીય મૂળના ઉદ્યોગપતિ નાગાર્જુન રેડ્ડીસાકમ પર ગંભીર આરોપો લગાવ્યા છે. ગોન્ઝાલેસનો દાવો છે કે અનેક ભારતીય મૂળના બિઝનેસ માલિકો ‘ભૂતિયા ઓફિસો’ (Ghost Offices) ચલાવી રહ્યા છે અને છેતરપિંડીથી વિઝા મેળવી રહ્યા છે.
 
ઓફિસના નામે ખાલી ઈમારત અને બંધ ફોન નંબર
સારા ગોન્ઝાલેસે ‘ગ્રેટ અમેરિકા ટેક્નોલોજીસ’ નામની કંપનીના સરનામે પહોંચીને દાવો કર્યો કે ત્યાં કોઈ ઓફિસ અસ્તિત્વમાં જ નથી. તેમણે સોશિયલ મીડિયા પર વિડીયો શેર કરતા જણાવ્યું કે, કંપનીના દસ્તાવેજોમાં જે સરનામું છે ત્યાં માત્ર એક ‘ખાલી ઈમારત અને વનસ્પતિથી છવાયેલું રમતનું મેદાન’ છે. ગોન્ઝાલેસના મતે, આ કંપનીએ એક પણ ફિઝિકલ ઓફિસ વિના ૩૦ જેટલા H-1B કામદારોને રોજગારી આપી હોવાનું દર્શાવ્યું છે, જે કાયદાકીય રીતે શંકાસ્પદ છે.
 
નાગાર્જુન રેડ્ડી અને યુટ્યુબર વચ્ચે તીખી બોલાચાલી
જ્યારે ગોન્ઝાલેસે આ મામલે નાગાર્જુન રેડ્ડીસાકમને સવાલ કર્યા, ત્યારે બંને વચ્ચે ઉગ્ર દલીલો થઈ હતી. રેડ્ડીસાકમે તમામ આરોપોને નકારી કાઢતા કહ્યું કે તેમની કંપની સંપૂર્ણપણે કાયદેસર છે અને તેમને યુએસ ઇમિગ્રેશન (USCIS) તરફથી તમામ સત્તાવાર સંદેશાવ્યવહાર મળી રહ્યા છે. તેમણે ગોન્ઝાલેસ પર ખાસ કરીને ભારતીયોને નિશાન બનાવવાનો (Targeting Indians) આરોપ લગાવ્યો, જેના જવાબમાં યુટ્યુબરે કહ્યું કે ભારતીયો દ્વારા H-1B સિસ્ટમનો ‘વધુ પડતો દૂરૂપયોગ’ થઈ રહ્યો છે.
 
કાયદેસરની લડાઈ અને સીઝ-એન્ડ-ડેસિસ્ટ લેટર
વિવાદ વધતા રેડ્ડીસાકમે ગોન્ઝાલેસને તાત્કાલિક ‘યુદ્ધવિરામ પત્ર’ (Cease and Desist letter) મોકલી આપ્યો છે, જેથી તેઓ આ વિડીયો કે માહિતી વધુ પ્રસારિત ન કરે. જોકે, ગોન્ઝાલેસે પીછેહઠ કરવાને બદલે એક્સ (X) પર લખ્યું કે, "આ બિઝનેસ માલિક ગભરાઈ ગયો છે અને તે નથી ઈચ્છતો કે તમે સત્ય જુઓ." આ વિવાદ એવા સમયે આવ્યો છે જ્યારે ટેક્સાસના એટર્ની જનરલ કેન પેક્સટને તાજેતરમાં જ એક નકલી બાળ સંભાળ કેન્દ્રના નામે વિઝા કૌભાંડ ચલાવતી કંપની પર કેસ કર્યો છે.
 
ઇમિગ્રેશન સિસ્ટમ પર ઉઠ્યા સવાલો
આ ઘટનાએ અમેરિકામાં H-1B વિઝા પ્રણાલીમાં રહેલી ખામીઓ અને નકલી કંપનીઓ દ્વારા થતી છેતરપિંડીના મુદ્દાને ફરીથી ચર્ચામાં લાવી દીધો છે. એક તરફ નિષ્ણાતો માને છે કે ઇમિગ્રેશન પર કડક પ્રતિબંધો અમેરિકાની નવીનતાને નુકસાન પહોંચાડે છે, તો બીજી તરફ આવા પર્દાફાશ બાદ સ્થાનિક લોકોમાં વિદેશી કામદારો પ્રત્યે રોષ જોવા મળી રહ્યો છે. હાલમાં આ મામલે સત્તાવાર તપાસની રાહ જોવાઈ રહી છે.