નવી દિલ્હી : આખી દુનિયામાં ઓઈલને લઈને ચાલી રહેલા તણાવ વચ્ચે દક્ષિણ અમેરિકાના નાના દેશ ગુયાનાએ ભારતને એક મોટી અને મહત્વપૂર્ણ ઓફર આપી છે, જેના અંતર્ગત ગુયાના ભારતને દરરોજ ૧૦ લાખ બેરલ ક્રૂડ ઓઇલ વેચવા તૈયાર છે. આ ઓફર ભારત માટે આર્થિક અને વ્યૂહાત્મક રીતે અત્યંત ફાયદાકારક સાબિત થઈ શકે છે, કારણ કે આ પરિમાણ ભારતની દૈનિક તેલ જરૂરિયાતના આશરે ૨૦ ટકા જેટલું થાય છે. ભારતમાં ગુયાનાના હાઈ કમિશનર ધર્મકુમાર સીરાજે સ્પષ્ટ કર્યું છે કે તેમનો દેશ ભારતનો ગાઢ વ્યૂહાત્મક ભાગીદાર બનવા માગે છે અને ક્રૂડ વેચવા ઉપરાંત રિફાઇનરી ક્ષેત્રે ભાગીદારી તથા એનર્જી કોરિડોર વિકસાવવા પણ ઉત્સુક છે.

એક સમય એવો હતો જ્યારે ગુયાનાની અર્થવ્યવસ્થા મુખ્યત્વે ખેતી પર આધારિત હતી, પરંતુ વર્ષ ૨૦૧૫માં સ્ટેબ્રોક બ્લોકના દરિયાઈ વિસ્તારમાં ક્રૂડ ઓઇલના વિશાળ ભંડાર મળી આવ્યા બાદ દેશની કાયાપલટ થઈ ગઈ છે. વર્ષ ૨૦૧૯માં અહીં તેલનું ઉત્પાદન શરૂ થવાથી ગુયાના વિશ્વના સૌથી ઝડપથી વિકસતા તેલ ઉત્પાદક દેશોમાં સામેલ થઈ ગયો છે અને હાલમાં તે પોતાની ઉત્પાદન ક્ષમતા વધારીને દરરોજ ૧૭ લાખ બેરલ સુધી પહોંચાડવા માગે છે. ગુયાનાની આ ઓફર માત્ર ક્રૂડ ઓઇલ વેચવા પૂરતી મર્યાદિત નથી, પરંતુ તે ONGC, IOC અને HPCL જેવી ભારતીય કંપનીઓને પોતાના તેલ ક્ષેત્રોમાં રોકાણ કરવા, ભાગીદારી ખરીદવા અને તેલની શોધ તથા ઉત્પાદન સાથે જોડવા તેમજ સ્થાનિક રિફાઇનરી સ્થાપવામાં ભારતીય એન્જિનિયરિંગ કુશળતાનો ઉપયોગ કરવા આમંત્રણ આપે છે.

આ ઉપરાંત ગુયાના એટલાન્ટિક મહાસાગરમાં સિંગાપોર અને રોટરડેમની જેમ એક મોટું ડીપ-વોટર બંકરિંગ હબ (દરિયાઈ જહાજોમાં ઇંધણ ભરવાની સુવિધા) વિકસાવવા માગે છે, અને ભારત પાસે બંદરો તથા દરિયાઈ ઇંધણ સુવિધાઓ વિકસાવવાનો મોટો અનુભવ હોવાથી ગુયાના આ ક્ષેત્રમાં પણ ભાગીદારી ઈચ્છે છે. આ સહયોગથી ભારતની ઊર્જા સુરક્ષા વધુ મજબૂત બનશે અને ભવિષ્યમાં આંતરરાષ્ટ્રીય બજારમાં પેટ્રોલ-ડીઝલના ભાવ તથા પુરવઠાની અનિશ્ચિતતાઓ સામે મોટી રાહત મળી શકશે.

આગામી સમયમાં બંને દેશો વચ્ચે ઉર્જા ક્ષેત્રના આ મોટા કરારને આખરી સ્વરૂપ આપવા માટે ઉચ્ચ સ્તરીય પ્રતિનિધિમંડળો દ્વારા બેઠકો યોજવામાં આવશે. ભારતીય તેલ કંપનીઓ ગુયાનામાં રોકાણ અને સંશોધનની સંભાવનાઓ ચકાસીને સત્તાવાર ભાગીદારીના નવા દ્વાર ખોલશે, જેનાથી દેશની ઈંધણ જરૂરિયાતોને દીર્ઘકાલીન સ્થિરતા મળશે.