ગુવાહાટી : આસામના ગુવાહાટી શહેરમાંથી એક અત્યંત સનસનાટીભર્યા અને દુઃખદ સમાચાર સામે આવ્યા છે. ગુવાહાટી યુનિવર્સિટીની આશાસ્પદ વિદ્યાર્થીની નિમિષા ઠાકુરિયા શહેરના બાહ્ય વિસ્તારમાં આવેલા અઝારા નજીકના એક હોમસ્ટેમાં ભેદી સંજોગોમાં મૃત હાલતમાં મળી આવતા સમગ્ર વિસ્તારમાં અરેરાટી સાથે ભારે ચકચાર મચી ગઈ છે. આ ઘટના બાદ મૃતક વિદ્યાર્થીનીના પિતા દીપજ્યોતિ ઠાકુરિયાએ આરોપી સામે કડકમાં કડક અને દાખલારૂપ સજાની માંગ કરી છે. દીકરીના અકાળે અવસાનથી ભાંગી પડેલા પિતાએ આક્રોશ વ્યક્ત કરતા કહ્યું હતું કે, "મને માત્ર ને માત્ર ન્યાય જોઈએ છે. સરકાર આરોપી સામે એવા કડક પગલાં ભરે કે મારી દીકરીએ જે પીડા અને પરિસ્થિતિનો સામનો કરવો પડ્યો છે, આરોપીએ પણ એ જ યાતનાઓ ભોગવવી પડે."

મળતી વિગતો મુજબ, શનિવારે વહેલી સવારે ત્રણ યુવકો નિમિષાને બેભાન અવસ્થામાં અઝારા પ્રાથમિક આરોગ્ય કેન્દ્ર ખાતે લઈ ગયા હતા. જ્યાં તેની ગંભીર હાલત જોતા તાત્કાલિક ગુવાહાટી મેડિકલ કોલેજ એન્ડ હોસ્પિટલ (GMCH) ખાતે રિફર કરવામાં આવી હતી. જોકે, હોસ્પિટલ પહોંચતા જ ફરજ પરના ડોક્ટરોએ તેને 'બ્રૉટ ડેડ' (લાવતા પહેલા જ મૃત્યુ પામેલી) જાહેર કરી હતી. ઘટનાની ગંભીરતાને ધ્યાનમાં રાખીને GMCH ખાતે મૃતદેહનું પોસ્ટમોર્ટમ કરાવવામાં આવ્યું છે, જેનો રિપોર્ટ આવ્યા બાદ મૃત્યુનું સાચું કારણ સ્પષ્ટ થશે.

ગુવાહાટી સિટી પોલીસ કમિશનરેટના ડીસીપી (પશ્ચિમ) બોલિન દેઓરીએ જણાવ્યા અનુસાર, પોલીસે તાબડતોબ કાર્યવાહી કરીને આશિક અલી નામના મુખ્ય આરોપીની ધરપકડ કરી લીધી છે અને હાલ તે પોલીસ કસ્ટડીમાં છે. પોલીસની પ્રાથમિક પૂછપરછ દરમિયાન આરોપી આશિક અલીએ દાવો કર્યો છે કે નિમિષાએ હોમસ્ટેના રૂમમાં સીલિંગ ફેન (પંખા) સાથે ફાંસી લગાવીને આત્મહત્યા કરી હતી. જોકે, પોલીસ આ દાવાને સત્ય માનવાને બદલે ફોરેન્સિક અને વૈજ્ઞાનિક દ્રષ્ટિકોણથી ઊંડાણપૂર્વક તપાસ કરી રહી છે.

બીજી તરફ, આ ઘટનાના સમાચાર વાયુવેગે પ્રસરતા જ સ્થાનિક રહીશો અને વિદ્યાર્થીઓનો ગુસ્સો ફાટી નીકળ્યો હતો. ધારાપુર વિસ્તારના સ્થાનિક લોકો અને છાત્રોએ રસ્તા પર ઉતરી આવીને ભારે વિરોધ પ્રદર્શન કર્યું હતું. આક્રોશિત ટોળાએ આરોપી સામે સખત કાર્યવાહીની માંગ સાથે નેશનલ હાઇવે-17 (NH-17) પર ચક્કાજામ કરી દીધો હતો, જેના કારણે વાહનવ્યવહાર ખોરવાયો હતો. હાલ પોલીસની ઉચ્ચ ટુકડી હોમસ્ટેના સીસીટીવી ફુટેજ અને ઘટનાસ્થળના પુરાવા એકત્ર કરીને આગળની કાર્યવાહી ચલાવી રહી છે.