ન્યૂ જર્સી, તા. 28: અમેરિકાના ન્યૂ જર્સી રાજ્યમાં મેડિકલ ક્ષેત્રે ભારતીય મૂળના ડૉક્ટર સુમુલ એન. રાવલે એક મોટી સિદ્ધિ હાંસલ કરી છે. તેઓ 'મેડિકલ સોસાયટી ઓફ ન્યૂ જર્સી' (MSNJ) ના પ્રેસિડેન્ટ-ઇલેક્ટ તરીકે ચૂંટાયા છે. આ વરણી રાજ્યભરના તબીબોમાં તેમના પ્રત્યે રહેલો વિશ્વાસ અને સમર્થન દર્શાવે છે. ડૉ. રાવલ એક બોર્ડ-સર્ટિફાઈડ ન્યુરોલોજિસ્ટ અને આંતરરાષ્ટ્રીય સ્તરે ખ્યાતિપ્રાપ્ત ન્યુરો-ઓન્કોલોજિસ્ટ છે.
ન્યૂ જર્સીના પ્રથમ બ્રેઈન ટ્યુમર સેન્ટરના સ્થાપક
ડૉ. સુમુલ રાવલ મોનમાઉથ મેડિકલ સેન્ટર ખાતે ન્યૂ જર્સીના સૌપ્રથમ વ્યાપક બ્રેઈન ટ્યુમર સેન્ટરના સ્થાપક નિયામક છે. તેઓ તેમની તબીબી કુશળતા, દર્દીઓ પ્રત્યેની દયાભાવના અને ન્યુરોલોજીકલ સારવારના ક્ષેત્રમાં કરેલા નવતર સંશોધનો માટે જાણીતા છે. હવે પ્રેસિડેન્ટ-ઇલેક્ટ તરીકે, તેઓ ન્યૂ જર્સીમાં દર્દીઓની સારવારને વધુ મજબૂત બનાવવા અને તબીબોને લગતા નીતિવિષયક નિર્ણયોમાં કેન્દ્રીય ભૂમિકા ભજવશે.
તબીબોના માનસિક સ્વાસ્થ્ય અને અધિકારો માટે લડત
ડૉ. રાવલના નેતૃત્વમાં સોસાયટી દ્વારા તબીબોમાં જોવા મળતા 'બર્નઆઉટ' (કામનું ભારણ), માનસિક સ્વાસ્થ્ય અને વહીવટી અવરોધોને દૂર કરવા માટે વિશેષ પ્રયાસો કરવામાં આવશે. તેઓ ખાસ કરીને વીમા ઓથોરાઈઝેશનની જટિલ પ્રક્રિયાઓમાં સુધારો લાવવા અને તબીબ-દર્દી વચ્ચેના સંબંધોને વધુ પારદર્શક બનાવવા માટે હિમાયત કરશે.
અમેરિકાની સૌથી જૂની મેડિકલ સંસ્થા
મેડિકલ સોસાયટી ઓફ ન્યૂ જર્સી વિશે નોંધનીય બાબત એ છે કે તેની સ્થાપના ઈ.સ. 1766 માં થઈ હતી. આ સંસ્થા અમેરિકાની સૌથી જૂની વ્યવસાયિક તબીબી સંસ્થા છે, જે 'અમેરિકન મેડિકલ એસોસિએશન' કરતા પણ 80 વર્ષ જૂની છે. તે હાલમાં 30,000 થી વધુ સક્રિય તબીબોનું પ્રતિનિધિત્વ કરે છે. આવી પ્રતિષ્ઠિત અને ઐતિહાસિક સંસ્થાના સર્વોચ્ચ પદ સુધી પહોંચીને ડૉ. સુમુલ રાવલે ન્યૂ જર્સીમાં વસતા ભારતીય સમુદાય અને ખાસ કરીને મેડિકલ ક્ષેત્ર સાથે સંકળાયેલા લોકોનું ગૌરવ વધાર્યું છે.