નવી દિલ્હી : કોરોનાવાયરસના ભયાનક રોગચાળા બાદ હવે વિશ્વ પર વધુ એક જીવલેણ વાયરસનો ખતરો મંડરાઈ રહ્યો છે. આફ્રિકન દેશોમાં ઝડપથી ફેલાઈ રહેલા ખતરનાક 'ઈબોલા વાયરસ' (Ebola Virus) ના સંક્રમણને ભારતમાં પ્રવેશતો અટકાવવા માટે કેન્દ્ર સરકાર તત્કાલ એક્શન મોડમાં આવી ગઈ છે. કેન્દ્રીય આરોગ્ય મંત્રાલયે ગુરૂવારે એક સત્તાવાર નિવેદન જારી કરીને દિલ્હી એરપોર્ટ સહિત દેશભરમાં આંતરરાષ્ટ્રીય મુસાફરો માટે ‘એર સુવિધા ૨.૦’ (Air Suvidha 2.0) પોર્ટલ ફરીથી સક્રિય કરવાની જાહેરાત કરી છે. વર્લ્ડ હેલ્થ ઓર્ગેનાઈઝેશન (WHO) દ્વારા આફ્રિકામાં ઈબોલાના પ્રકોપને 'પબ્લિક હેલ્થ ઇમરજન્સી' જાહેર કરાયા બાદ ભારતે આ સાવચેતીનું મોટું પગલું ભર્યું છે.

૨૧ દિવસનો ઇતિહાસ અને લક્ષણો જાહેર કરવા પડશે

આરોગ્ય અને પરિવાર કલ્યાણ મંત્રાલયના આરોગ્ય સેવા મહાનિર્દેશાલયના સહયોગથી વિકસાવવામાં આવેલી આ નવી સિસ્ટમ હેઠળ, ઈબોલા પ્રભાવિત દેશોમાંથી આવતા મુસાફરોએ ભારતમાં આવતા ૨૪ કલાક પહેલાં ઓનલાઈન સ્વ-ઘોષણા ફોર્મ (Self-Declaration Form - SDF) એટલે કે એક પ્રકારનું સોગંદનામું ભરવું પડશે. ઇમિગ્રેશન ક્લિયરન્સ પહેલાં આ ફોર્મ બતાવવું ફરજિયાત રહેશે. આ ફોર્મમાં મુસાફરોએ પોતાનો છેલ્લા ૨૧ દિવસનો પ્રવાસ ઇતિહાસ (Travel History), તેઓ કોના સંપર્કમાં આવ્યા હતા તેની વિગતો અને જો તેમના શરીરમાં ઈબોલા સંબંધિત કોઈ પણ લક્ષણો દેખાતા હોય તો તેની સાચી માહિતી આપવાની રહેશે.

એરપોર્ટ પર ઉતરતા જ મળશે ઝડપી ક્લિયરન્સ

આ નવી વ્યવસ્થાનો સૌથી મોટો ફાયદો એ છે કે મુસાફરોની આગમન પ્રક્રિયા સંપૂર્ણપણે સંપર્ક રહિત (Contactless) રહેશે. પ્રવાસીઓને ફ્લાઇટમાં ચઢતા પહેલા અથવા વેબ ચેક-ઇન દરમિયાન જ સત્તાવાર વેબસાઇટ airsuvidha.civilaviation.gov.in પર જઈને આ ફોર્મ ભરી લેવાની સલાહ આપવામાં આવી છે, જેથી ભારતમાં લેન્ડિંગ વખતે એરપોર્ટ પર ફોર્મ ભરવા માટે લાંબી લાઈનોમાં ઉભા ન રહેવું પડે. આ પોર્ટલ એરપોર્ટ હેલ્થ ઓફિસર્સ, ઇમિગ્રેશન બ્યુરો અને રાજ્ય દેખરેખ અધિકારીઓ સાથે રીઅલ-ટાઇમ ડેટા શેર કરે છે, જેનાથી શંકાસ્પદ મુસાફરોની તુરંત ઓળખ કરી શકાશે.

આ દેશોને 'હાઈ રિસ્ક' શ્રેણીમાં મૂકવામાં આવ્યા

વૈજ્ઞાનિક તપાસમાં ઈબોલાના આ પ્રકોપની પુષ્ટિ 'બુંદીબુગ્યો વાયરસ રોગ' (BVD) તરીકે થઈ છે. હાલમાં આ ઘાતક ચેપ કોંગો અને યુગાન્ડાની સરહદો પર ખૂબ જ ઝડપથી ફેલાઈ રહ્યો છે. પરિણામે, ભારત સરકારે કોંગો, યુગાન્ડા અને દક્ષિણ સુદાન સહિત તેમની સરહદોને અડીને આવેલા તમામ દેશોને 'ઉચ્ચ જોખમ ધરાવતા દેશો' (High-Risk Countries) તરીકે જાહેર કર્યા છે અને ત્યાંથી આવતા તમામ પ્રવાસીઓ પર કડક નજર રાખવામાં આવી રહી છે.