મુંબઈ : આજના આધુનિક યુગમાં આર્ટિફિશિયલ ઈન્ટેલિજન્સ (AI) દ્વારા શિક્ષણ ક્ષેત્રે ઝડપી પરિવર્તનો આવી રહ્યા છે. આ પૃષ્ઠભૂમિમાં શિક્ષણવિદો, શાળાના વડાઓ અને માનસિક સ્વાસ્થ્ય નિષ્ણાતોએ ચેતવણી આપી છે કે કેવળ ટેક્નોલોજી પર નિર્ભર રહેવાને બદલે વિદ્યાર્થીઓમાં વિવેકપૂર્ણ વિચારસરણી (critical thinking), ભાવનાત્મક બુદ્ધિ (emotional intelligence) અને મજબૂત માનવીય સંબંધો કેળવવા અત્યંત આવશ્યક છે.

વિશ્વ માનસિક સ્વાસ્થ્ય દિવસ નિમિત્તે 'આર્ટ ઓફ લિવિંગ ફાઉન્ડેશન'ના 'ચિલ્ડ્રન એન્ડ ટીન્સ ડેસ્ક' દ્વારા 'એજ્યુકેટર્સ એજ: ધ હ્યુમન એજ ઇન ધ એજ ઓફ AI' શીર્ષક હેઠળ એક વિશેષ કાર્યક્રમનું આયોજન કરવામાં આવ્યું હતું. આ સંમેલનમાં બાળ વિકાસ નિષ્ણાતો અને મનોવૈજ્ઞાનિકોએ એકત્ર થઈને વિદ્યાર્થીઓના માનસિક સ્વાસ્થ્ય પર AIની અસરો વિશે ઊંડાણપૂર્વક ચર્ચા કરી હતી.

આ ચર્ચામાં ધીરુભાઈ અંબાણી ઈન્ટરનેશનલ સ્કૂલના સીઈઓ અભિમન્યુ બસુએ જણાવ્યું હતું કે AIનો ઉપયોગ માત્ર એક સાધન તરીકે થવો જોઈએ, જે વિદ્યાર્થીઓ માટે વિચારવાનું કામ કરવાને બદલે તેમને શીખવામાં મદદરૂપ બને. સિંઘાનિયા ગ્રુપ ઓફ સ્કૂલ્સના રેવતી શ્રીનિવાસને વાલીઓ અને બાળકો વચ્ચેના સંવાદ પર ભાર મૂકતા જણાવ્યું કે પરિવારોમાં હવે અર્થપૂર્ણ વાતચીતને બદલે માત્ર પૂછપરછ થતી જોવા મળે છે, જેના કારણે સંબંધોમાં અંતર વધી શકે છે.

શિક્ષકોની માનસિક સુખાકારી અને પરીક્ષાઓના દબાણ વિશે ચિંતા વ્યક્ત કરતા નિષ્ણાતોએ જણાવ્યું કે માર્ક્સ પાછળ દોડવા કરતાં બાળકોમાં સાચી જિજ્ઞાસા અને સ્વતંત્ર વિચારસરણી વિકસાવવી જોઈએ. કાર્યક્રમનું સમાપન શિક્ષણવિદો અને નીતિ નિર્માતાઓએ ટેક્નોલોજીની પ્રગતિની સાથે સાથે વિદ્યાર્થીઓની માનસિક સુખાકારીને પ્રાથમિકતા આપતું સંતુલિત શૈક્ષણિક વાતાવરણ ઊભું કરવાના સંકલ્પ સાથે થયું હતું.