કોલકાતા. પશ્ચિમ બંગાળના રાજકીય ગલિયારાઓમાંથી આ સમયના સૌથી મોટા સમાચાર સામે આવી રહ્યા છે. મમતા બેનર્જીના ગઢને ધરાશાયી કરીને સત્તાના સિંહાસન પર બેસેલી મુખ્યમંત્રી સુવેન્દુ અધિકારીના નેતૃત્વવાળી નવી ભાજપ સરકાર આવતા અઠવાડિયે રાજ્ય વિધાનસભામાં યુનિફોર્મ સિવિલ કોડ (UCC) બિલ રજૂ કરવાની જોરદાર તૈયારી કરી રહી છે. ઉચ્ચ સત્તાવાર સૂત્રોના જણાવ્યા અનુસાર, આગામી સોમવારે જ આ બિલ ગૃહ સમક્ષ લાવવામાં આવી શકે છે અને આ ઐતિહાસિક કાયદાને મંજૂરી આપવા માટે એક વિશેષ સત્ર બોલાવવાની પણ પૂરી સંભાવના છે. જો કે હજી સુધી આ અંગે કોઈ સત્તાવાર જાહેરાત નથી થઈ, પરંતુ બંગાળના રાજકારણમાં અત્યારથી જ ભારે ગરમાવો આવી ગયો છે.

યુનિફોર્મ સિવિલ કોડ એટલે કે સમાન નાગરિક ધારો લાવવાનો મુખ્ય ઉદ્દેશ્ય જાતિ, જ્ઞાતિ કે ધર્મના ભેદભાવ વિના રાજ્યના તમામ નાગરિકો માટે લગ્ન, છૂટાછેડા, ઉત્તરાધિકાર અને દત્તક લેવા જેવા વિષયો પર એક સમાન કાયદો લાગુ કરવાનો છે. જો સુવેન્દુ સરકાર આ બિલને વિધાનસભામાં પસાર કરાવી લે છે, તો પશ્ચિમ બંગાળ દેશનું ચોથું એવું રાજ્ય બનશે જ્યાં આ કાયદો લાગુ થશે. આ પહેલા ફેબ્રુઆરી ૨૦૨૪માં ઉત્તરાખંડ યુસીસી લાગુ કરનાર દેશનું પ્રથમ રાજ્ય બન્યું હતું, જ્યારે આ વર્ષની શરૂઆતમાં ગુજરાત અને આસામ પણ આ યાદીમાં જોડાઈ ચૂક્યા છે. આ સિવાય મધ્યપ્રદેશના મુખ્યમંત્રી મોહન યાદવે પણ આગામી જુલાઈ મહિનામાં યુસીસી લાવવાના સંકેત આપ્યા છે.

નોંધનીય છે કે પશ્ચિમ બંગાળની હાઈ-વોલ્ટેજ વિધાનસભા ચૂંટણી દરમિયાન ભાજપે પોતાના પ્રચારમાં યુસીસીને મુખ્ય મુદ્દો બનાવ્યો હતો. પાર્ટીનો 'સંકલ્પ પત્ર' જાહેર કરતી વખતે કેન્દ્રીય ગૃહમંત્રી અમિત શાહે બંગાળની જનતાને વાયદો કર્યો હતો કે ભાજપ સરકાર બન્યાના છ મહિનાની અંદર જ રાજ્યમાં સમાન નાગરિક ધારો અમલી બનશે. તાજેતરમાં જ સંપન્ન થયેલી ચૂંટણીમાં ભાજપે ૨૯૩માંથી ૨૦૭ બેઠકો જીતીને ઐતિહાસિક બહુમતી મેળવી હતી, જે પેટાચૂંટણી બાદ ૨૦૮ પર પહોંચી છે, જ્યારે ટીએમસી (TMC) માત્ર ૮૦ બેઠકો પર સમેટાઈ ગઈ છે. હવે સત્તા હાથમાં લેતાની સાથે જ સુવેન્દુ અધિકારીની સરકાર પોતાના આ સૌથી મોટા અને દૂરોગામી વચનને કાયદાનું સ્વરૂપ આપવા માટે સંપૂર્ણ રીતે તૈયાર દેખાઈ રહી છે.