નવી દિલ્હી :કેન્દ્રીય ગૃહમંત્રી અમિત શાહે શુક્રવારે નાર્કોટિક્સ કંટ્રોલ બ્યુરો (NCB) દ્વારા આયોજિત NCORD ની ૧૦મી ઉચ્ચ સ્તરીય બેઠકમાં ડ્રગ નિયંત્રણ માટે ત્રણ વર્ષનો (૨૦૨૬-૨૦૨૯) વ્યાપક વિઝન દસ્તાવેજ જાહેર કર્યો છે. આ વ્યૂહરચનાનો મુખ્ય ઉદ્દેશ્ય ડ્રગ્સની હેરાફેરી, દુરુપયોગ અને ગેરકાયદેસર નાણાકીય પ્રવાહને રોકવા માટે રાજ્યો અને વિવિધ મંત્રાલયોને એકસાથે લાવીને દેશભરમાં સંકલિત કાર્યવાહી કરવાનું છે.
શ્રી શાહના મતે, આ સંપૂર્ણ રોડ મેપ "શોધો, વિક્ષેપિત કરો અને નાશ કરો" (Detect, Disrupt, and Destroy) ના પાયા પર તૈયાર કરવામાં આવ્યો છે. આ વ્યૂહરચના હેઠળ, સંગઠિત ગુનાહિત નેટવર્કને તોડી પાડવા અને ડ્રગ્સની સમગ્ર ઇકોસિસ્ટમને જડમૂળથી ઉખેડી નાખવા માટે સમય-બાઉન્ડ રાષ્ટ્રીય નીતિ અમલમાં મૂકવામાં આવશે. તેમાં ફાર્માસ્યુટિકલ ક્ષેત્ર અને સુરક્ષા એજન્સીઓ વચ્ચે વધુ સારું સંકલન સાધીને ડ્રગ્સના જોખમને નાથવાનો પ્રયાસ કરવામાં આવશે.
NCORD એ કેન્દ્રીય ગૃહ મંત્રાલય દ્વારા સ્થાપિત એક ચાર-સ્તરીય પદ્ધતિ છે, જે વિવિધ હિસ્સેદારોને એક છત્ર હેઠળ લાવે છે. આ આયોજન હેઠળ ડ્રગ્સની દાણચોરી કરતા મોટા માફિયાઓ પર સખત કાર્યવાહી કરવા સાથે, સંવેદનશીલ સરહદી વિસ્તારો અને દરિયાઈ માર્ગો પર પણ દેખરેખ વધારવામાં આવશે. નાર્કોટિક્સ વિરોધી અભિયાનમાં ટેકનોલોજી અને ડેટા-ડ્રિવન તપાસને વધુ પ્રાથમિકતા આપવામાં આવી છે.
આ અગાઉ પણ સરકારે ડ્રગ્સ વિરોધી અભિયાન તેજ કર્યું હતું, પરંતુ ૨૦૨૬-૨૯નો આ દસ્તાવેજ વધુ આક્રમક છે. આગામી સમયમાં આ નીતિના ભાગરૂપે ડ્રગ્સના કેસોમાં ઝડપી ટ્રાયલ, ગુનેગારોની સંપત્તિ જપ્તી અને પુનર્વસન માટેના વધુ કેન્દ્રો સ્થાપવાની કામગીરી હાથ ધરવામાં આવશે. સરકારની આ કવાયતનો હેતુ ભારતને ડ્રગ-મુક્ત બનાવવાનો છે, જેના માટે રાષ્ટ્રીય સ્તરે સઘન તપાસ ઝુંબેશ ચલાવવામાં આવશે.