નવી દિલ્હી : પશ્ચિમ એશિયાના અશાંત દરિયાઈ વિસ્તારોમાં ભારતીય જહાજો અને ખલાસીઓની સુરક્ષાને લઈને સોશિયલ મીડિયા અને ઓનલાઈન પોર્ટલ પર ફેલાઈ રહેલી અફવાઓનો ભારત સરકારે અંત આણ્યો છે. બંદરો, શિપિંગ અને જળમાર્ગ મંત્રાલયે સત્તાવાર રીતે સ્પષ્ટતા કરી છે કે ભારતીય જહાજ ‘સનમાર હેરાલ્ડ’ દ્વારા કોઈ ખંડણી ચૂકવવામાં આવી નથી અને જહાજના તમામ કર્મચારીઓ સુરક્ષિત છે.

શું હતી અફવા અને શું છે સત્ય?

છેલ્લા કેટલાક દિવસોથી એવા અહેવાલો વહેતા થયા હતા કે પશ્ચિમ એશિયાના દરિયામાં ‘સનમાર હેરાલ્ડ’ જહાજના કેપ્ટને ઈરાની સૈન્ય (IRGC) ના નામે ખંડણી માંગનારા સાયબર ગુનેગારોને મોટી રકમ ચૂકવી છે. જોકે, મંત્રાલયના અધિક સચિવ મુકેશ મંગલે આંતર-મંત્રાલય બ્રીફિંગમાં જણાવ્યું હતું કે, “અમે જહાજના માલિક સાથે સીધી વાત કરી છે. આ સમાચાર તદ્દન ખોટા અને ‘ફેક ન્યૂઝ’ છે. આવી કોઈ જ ઘટના બની નથી.”

‘દેશ ગરીમા’ ટેન્કરની મુંબઈમાં ઘરવાપસી

ભારતીય નાવિકોના પરિવારો માટે એક સુખદ સમાચાર એ છે કે ૩૧ ભારતીય ખલાસીઓ સાથેનું ક્રૂડ ઓઈલ ટેન્કર ‘દેશ ગરીમા’ આજે મુંબઈ બંદરે ડોક થવાની તૈયારીમાં છે. આ જહાજે ૧૮ માર્ચે અત્યંત જોખમી ગણાતા દરિયાઈ વિસ્તારોને સફળતાપૂર્વક પાર કર્યા હતા અને કોઈ પણ અપ્રિય ઘટના વિના તે સુરક્ષિત રીતે ભારત પરત ફરી રહ્યું છે.

સુરક્ષા એજન્સીઓ હાઈ-એલર્ટ પર

સરકારે ખાતરી આપી છે કે પર્સિયન ગલ્ફ ક્ષેત્રમાં હાજર ૧૪ ભારતીય જહાજો પર સતત નજર રાખવામાં આવી રહી છે. જેમાંથી ૧૦ જહાજો પહેલેથી જ સુરક્ષિત રીતે બહાર નીકળી ગયા છે. વિદેશ મંત્રાલય અને ભારતીય નૌકાદળ સાથે મળીને શિપિંગ મંત્રાલય દરિયાઈ માર્ગો પર સતત મોનિટરિંગ કરી રહ્યું છે. છેલ્લા ૨૪ કલાકમાં ભારતીય ધ્વજવાળા જહાજો સાથે કોઈ અપ્રિય ઘટના નોંધાઈ નથી.

મેરીટાઇમ કંટ્રોલ રૂમની સક્રિય કામગીરી

નાવિકોની મદદ માટે બનાવવામાં આવેલા મેરીટાઇમ કંટ્રોલ રૂમે અત્યાર સુધીમાં ૭,૨૦૦થી વધુ કોલ્સ અને ૧૫,૦૦૦ ઇમેઇલ્સનું સંચાલન કર્યું છે. સરકારની સતર્કતાને કારણે અત્યાર સુધીમાં ૨,૬૧૫ ભારતીય નાવિકોને સુરક્ષિત રીતે સ્વદેશ પરત લાવવામાં આવ્યા છે. દેશના તમામ બંદરો પર કામગીરી સામાન્ય છે અને માલસામાનની હેરફેરમાં કોઈ અવરોધ નથી.

ભારત સરકારે ફરી એકવાર સાબિત કરી દીધું છે કે વૈશ્વિક અશાંતિ વચ્ચે પણ તેના નાવિકો અને દરિયાઈ હિતોની સુરક્ષા તેની સર્વોચ્ચ પ્રાથમિકતા છે. દરિયાઈ પરિવારોને કોઈપણ પ્રકારની અફવાઓથી ન ગભરાવા મંત્રાલયે અપીલ કરી છે.