નવી દિલ્હી : દેશના ખેડૂતો અને નાના ઉદ્યોગસાહસિકોને મોટી રાહત આપતા કેન્દ્ર સરકારે રબી સીઝન ૨૦૨૬-૨૭ માટે ૬૨,૩૭૦ કરોડ રૂપિયાની જંગી ખાતર સબસીડી મંજૂર કરી છે. નવી દિલ્હીમાં વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય મંત્રીમંડળની બેઠકમાં આ મહત્વપૂર્ણ નિર્ણય લેવામાં આવ્યો છે. આ સાથે સરકારે સૂક્ષ્મ અને અતિ નાના એકમો માટેની લોન ગેરંટી યોજનાને આગામી પાંચ વર્ષ એટલે કે ૩૧ માર્ચ ૨૦૩૧ સુધી લંબાવવાની પણ સત્તાવાર જાહેરાત કરી છે.

અંતરરાષ્ટ્રીય બજારમાં કાચા માલ અને ખાતરના વધતા ભાવો વચ્ચે પણ ખેડૂતો પર આર્થિક બોજ ન પડે તે માટે સરકારે આ પગલું ભર્યું છે. ફાસ્ફેટ અને પોટાશ (P&K) ખાતરો પર 'પોષક તત્વ આધારિત સબસીડી' (NBS) હેઠળ મંજૂર કરાયેલી આ ૬૨,૩૭૦ કરોડ રૂપિયાની રકમ પાછલી રબી સીઝન કરતા ૨૪,૪૧૮ કરોડ વધુ છે. આ નિર્ણયના કારણે ખેડૂતોને ૫૦ કિલોગ્રામની ડીએપી (DAP) ખાતરની ગુણી માત્ર ૧,૩૫૦ રૂપિયામાં જ ઉપલબ્ધ થતી રહેશે, જેનાથી અન્નદાતાઓને મોટો આર્થિક ટેકો મળશે.

ખાતર સબસીડી ઉપરાંત કેબિનેટે 'ક્રેડિટ ગેરંટી ફંડ ફોર માઇક્રો યુનિટ્સ' (CGFMU) યોજનાને આગામી ૫ વર્ષ માટે લંબાવતા ૫,૦૦૦ કરોડ રૂપિયાના કોષને મંજૂરી આપી છે. આ યોજના હેઠળ પ્રધાનમંત્રી મુદ્રા યોજના (PMMY) અંતર્ગત નાના ઉદ્યોગોને ૨૦ લાખ રૂપિયા સુધીની લોન પર ગેરંટી કવર મળશે અને ગેરંટી ફી ઘટાડીને ૧% થી ૦.૭૫% કરી દેવામાં આવી છે. આનાથી બેંકો અને નાણાકીય સંસ્થાઓ દ્વારા ૧૨.૬ લાખ કરોડ રૂપિયા સુધીની નવી લોન મંજૂર કરવા માટે સરળ વાતાવરણ ઊભું થશે.

ભૂતકાળમાં જાન્યુઆરી ૨૦૧૬થી શરૂ થયેલી આ ક્રેડિટ ગેરંટી યોજનાએ દેશભરમાં કરોડો નાના વ્યાપારીઓ, મહિલા સ્વસહાય જૂથો (SHG) અને જનધન ખાતાધારકોને સ્વરોજગાર શરૂ કરવામાં મહત્વપૂર્ણ ભૂમિકા ભજવી છે. હવે આ યોજના ૨૦૩૧ સુધી લંબાવાતા અને ખાતરના ભાવો સ્થિર રહેતા, આગામી સમયમાં કૃષિ ઉત્પાદકતા અને ગ્રામીણ અર્થતંત્રને વેગ મળવાની સાથે નાના સાહસિકોને ધિરાણ મેળવવામાં ભારે સરળતા રહેશે.