વોશિંગ્ટન, તા. ૧૪: આગામી ફિફા (FIFA) વર્લ્ડ કપના રોમાંચ વચ્ચે યુનાઇટેડ સ્ટેટ્સ સરકારે ફૂટબોલ ચાહકો માટે એક રાહતના સમાચાર આપ્યા છે. અમેરિકાએ જાહેરાત કરી છે કે તે વર્લ્ડ કપ જોવા આવવા માંગતા ચોક્કસ દેશોના ચાહકો માટે ‘વિઝા બોન્ડ’ની કડક સિસ્ટમમાં મોટી છૂટછાટ આપશે. સ્ટેટ ડિપાર્ટમેન્ટના આ નિર્ણયથી વિકાસશીલ દેશોના હજારો ચાહકો માટે વર્લ્ડ કપના મેદાન સુધી પહોંચવું હવે સરળ બનશે.
 
શું છે વિઝા બોન્ડનો વિવાદ?
રાષ્ટ્રપતિ ડોનાલ્ડ ટ્રમ્પની પ્રવાસન નીતિ હેઠળ, ૫૦ વિકાસશીલ દેશોના નાગરિકો માટે અમેરિકાના વિઝા મેળવવા $૫,૦૦૦ થી $૧૫,૦૦૦ (અંદાજે રૂ. ૪ લાખ થી ૧૨.૫ લાખ) સુધીનો વિઝા બોન્ડ જમા કરાવવો ફરજિયાત હતો. આ રકમ મુસાફર પોતાના દેશમાં પરત ફરે ત્યારે જ પાછી મળતી હતી. અનેક દેશો માટે આ રકમ તેમના નાગરિકોની સરેરાશ ત્રણ વર્ષની આવક જેટલી મોટી હતી, જેના કારણે ચાહકોમાં નિરાશા હતી.
 
કોને મળશે બોન્ડમાંથી મુક્તિ?
નવા આદેશ મુજબ, જે ચાહકો પાસે વર્લ્ડ કપની મેચોની ટિકિટ પહેલેથી જ છે અને જેમણે વિઝા માટેની પ્રાયોરિટી સિસ્ટમમાં નોંધણી કરાવી છે, તેમને આ બોન્ડ ચૂકવવામાંથી મુક્તિ આપવામાં આવશે. આ ઉપરાંત, વર્લ્ડ કપમાં ભાગ લેનારા ખેલાડીઓ અને ટીમના સભ્યોને પણ આ કડક નિયમોમાંથી બહાર રાખવામાં આવ્યા છે. કોન્સ્યુલર અફેર્સના સહાયક સચિવ મોરા નામદારે જણાવ્યું હતું કે, "અમે રાષ્ટ્રીય સુરક્ષા જાળવી રાખીને કાયદેસરની મુસાફરીને પ્રોત્સાહન આપવા અને ઇતિહાસનો સૌથી મોટો વર્લ્ડ કપ યોજવા કટિબદ્ધ છીએ."
 
ક્વોલિફાય થયેલા દેશોને મોટો ફાયદો
વર્લ્ડ કપ માટે ક્વોલિફાય થયેલા અલ્જેરિયા, કેપ વર્ડે, આઇવરી કોસ્ટ, સેનેગલ અને ટ્યુનિશિયા જેવા દેશો માટે આ નિર્ણય સંજીવની સમાન છે. આ એવા દેશો છે જેમના નાગરિકોએ અગાઉ વિઝા બોન્ડ ચૂકવવા પડતા હતા. જોકે, હૈતી અને ઈરાન જેવા દેશોના ચાહકો માટે હજુ પણ પડકારો છે, કારણ કે આ દેશો પર ટ્રમ્પ શાસનકાળમાં લગભગ સંપૂર્ણ પ્રવાસ પ્રતિબંધ લાદવામાં આવ્યો છે.
 
રેકોર્ડ-બ્રેકિંગ ઇવેન્ટની આશા
ફિફાના પ્રવક્તાએ આ પગલાને આવકારતા કહ્યું કે, અમેરિકી સરકાર અને વ્હાઇટ હાઉસ ટાસ્ક ફોર્સ સાથેનો અમારો સહયોગ એક અવિસ્મરણીય અને રેકોર્ડ-બ્રેકિંગ ઇવેન્ટ પૂરી કરવા માટે સતત ચાલુ છે. ઉલ્લેખનીય છે કે ૧૧ જૂનથી શરૂ થનારા આ વર્લ્ડ કપનું યજમાન પદ અમેરિકા, કેનેડા અને મેક્સિકો સંયુક્ત રીતે સંભાળી રહ્યા છે. અમેરિકાના આ ઉદાર વલણથી હવે સ્ટેડિયમમાં વિવિધ દેશોના ચાહકોની ગુંજ જોવા મળશે તેવી આશા છે.