મુંબઈ, તા.૨૪: મેટાની માલિકીનું લોકપ્રિય ઇન્સ્ટન્ટ મેસેજિંગ પ્લેટફોર્મ વોટ્સએપ તેના કરોડો યુઝર્સના અનુભવને વધુ શ્રેષ્ઠ, આકર્ષક અને સરળ બનાવવા માટે સતત નવા-નવા ફીચર્સ ઉમેરી રહ્યું છે. આ જ શ્રેણીમાં આગળ વધતા વોટ્સએપે હવે સ્ટેટસ અપડેટ્સ શોખીનો માટે એક અત્યંત ઉપયોગી અને ધમાકેદાર 'સ્ટાર્ડ મ્યુઝિક' (Starred Music) ફીચર રોલઆઉટ કરવાનું શરૂ કર્યું છે. આ નવા અપડેટની મદદથી યુઝર્સ સ્ટેટસ એડિટ કરતી વખતે મેટાની વિશાળ લાઈબ્રેરીમાંથી પોતાના મનપસંદ ગીતોને 'સ્ટાર' માર્ક કરીને કાયમી ધોરણે સેવ કરી શકશે. પરિણામે, દર વખતે નવું સ્ટેટસ મૂકતી વખતે ગીતો ફરીથી સર્ચ કરવાની મોટી માથાકૂટમાંથી કાયમ માટે મુક્તિ મળી જશે.

નવા ફીચરની સાથે વોટ્સએપે એક અદ્યતન વેવફોર્મ સિલેક્ટર અને ડ્યુરેશન પિકર પણ રજૂ કર્યું છે, જેનાથી સ્ટેટસ બનાવવાની પ્રક્રિયા ખૂબ જ પ્રોફેશનલ બની જશે. આ ટૂલ્સની મદદથી યુઝર્સ ગીતની વેવફોર્મ લાઇનને આગળ-પાછળ ડ્રેગ કરીને પોતાના મનપસંદ ગીતની શ્રેષ્ઠ લાઇન કે મ્યુઝિક બીટને ચોક્કસ ટાઇમિંગ સાથે પસંદ કરી શકશે. તેમજ સ્ટેટસમાં મ્યુઝિક ક્લિપ કેટલા સેકન્ડ સુધી પ્લે કરવી છે તેનું ટાઈમિંગ પણ સરળતાથી સેટ કરી શકાશે.

આ નવું ફીચર હાલમાં 'વોટ્સએપ બીટા ફોર એન્ડ્રોઇડ'ના અપડેટમાં જોવા મળી રહ્યું છે. જ્યારે પણ યુઝર મ્યુઝિક કેટલોગમાંથી કોઈ ગીત સિલેક્ટ કરશે, ત્યારે સ્ક્રીન પર એક સ્ટાર આઇકન જોવા મળશે. તેના પર ટેપ કરતાં જ તે ટ્રેક 'સ્ટાર્ડ લિસ્ટ'માં ઉમેરાઈ જશે. યુઝર્સ પોતાની પસંદગી મુજબ ગમે તેટલા ગીતો સ્ટાર કરી શકે છે અને ઈચ્છે ત્યારે અન-સ્ટાર પણ કરી શકે છે. આ ઉપરાંત મ્યુઝિક સિલેક્શન સ્ક્રીન પર 'સજેસ્ટેડ', 'મૂડ' અને 'જૉનરા' ની સાથે નવું 'Starred' ફિલ્ટર પણ ઉમેરાયું છે, જ્યાંથી સેવ કરેલા ગીતો એક જ ક્લિકમાં મળી જશે.