મુંબઈ :  જો તમે ફિક્સ્ડ ડિપોઝિટ માં રોકાણ કરવાનું આયોજન કરી રહ્યા છો અથવા અગાઉથી રોકાણ કરી ચૂક્યા છો, તો ૧ ઓક્ટોબર, ૨૦૨૬ થી અમલમાં આવનારા રિઝર્વ બેંક ઓફ ઇન્ડિયાના નવા નિયમો તમારા માટે ખૂબ જ મહત્વપૂર્ણ છે. RBI એ ડિપોઝિટ પર વ્યાજ ચૂકવણી અને તેની જાહેરાત માટેના કાયદાઓમાં મોટો સુધારો કર્યો છે, જેનો મુખ્ય હેતુ બેંકિંગ ક્ષેત્રમાં પારદર્શિતા લાવવાનો અને ગ્રાહકોના હિતોનું રક્ષણ કરવાનો છે. આ નવા નિયમો માત્ર વાણિજ્યિક બેંકો જ નહીં પરંતુ સ્મોલ ફાઇનાન્સ બેંકો, પ્રાદેશિક ગ્રામીણ બેંકો અને સહકારી બેંકોને પણ સમાન રીતે લાગુ પડશે.

નવા નિયમો અમલમાં આવ્યા બાદ, હવે એક જ બેંકની વિવિધ શાખાઓ સમાન મુદત અને રકમની FD પર અલગ-અલગ વ્યાજ દર ઓફર કરી શકશે નહીં. ભૂતકાળમાં કેટલીક બેંક શાખાઓ સ્થાનિક સ્પર્ધા અથવા ટાર્ગેટ પૂરા કરવા માટે ગ્રાહકોને અલગ વ્યાજ દર આપતી હતી, પરંતુ હવે તે પ્રથા સંપૂર્ણપણે નાબૂદ થશે. જો એક જ દિવસે એક જ પ્રકારની FD કરવામાં આવે, તો તે બેંકની દેશભરની તમામ શાખાઓમાં ગ્રાહકોને એકસમાન વ્યાજ દર જ મળશે. RBI એ સ્પષ્ટ કર્યું છે કે બેંકોએ તમામ ગ્રાહકો સાથે સમાન અને ન્યાયી વ્યવહાર કરવાનો રહેશે.

ગ્રાહકોની સુવિધા માટે વ્યાજ દરોની જાહેર જાહેરાત પણ હવે ફરજિયાત કરવામાં આવી છે. તમામ બેંકોએ તેમના FD વ્યાજ દરોનું સંપૂર્ણ પત્રક પોતાની અધિકૃત વેબસાઇટ પર અગાઉથી ઉપલબ્ધ કરાવવું પડશે. ઉપરાંત, બલ્ક ડિપોઝિટ પરના વ્યાજ દરો પણ દરરોજ સવારે ૧૦ વાગ્યા સુધીમાં અપડેટ કરવાના રહેશે. જોકે, આ નિયમોથી FD ના વ્યાજ દરો રાતોરાત ઘટી કે વધી નહીં જાય, પરંતુ ગ્રાહકો માટે વિવિધ બેંકોના દરોની સરખામણી કરવી અને યોગ્ય બેંક પસંદ કરવી પહેલા કરતા ઘણી વધુ સરળ અને મૂંઝવણમુક્ત બની જશે.