કુર્નૂલ:ભારતના સુવર્ણ ઇતિહાસમાં એક નવું અને ઝળહળતું પ્રકરણ લખાવા જઈ રહ્યું છે. આંધ્રપ્રદેશના કુર્નૂલ જિલ્લામાં આવેલી જોનાગિરી સોનાની ખાણ આવતા મહિનાથી કાર્યરત થવા માટે સજ્જ છે. જીઓમાયસોર સર્વિસીસ ઇન્ડિયા પ્રાઇવેટ લિમિટેડ દ્વારા સંચાલિત આ પ્રોજેક્ટ દેશનો પ્રથમ મોટા પાયે ખાનગી સોનાની ખાણકામનો પ્લાન્ટ છે. અત્યાર સુધી ભારત પોતાની વાર્ષિક ૮૦૦ ટનથી વધુ સોનાની જરૂરિયાત માટે વિદેશી આયાત પર નિર્ભર રહેતું હતું, પરંતુ ૪૨.૫ ટન સોનાના અકબંધ ભંડાર ધરાવતી આ ખાણ ભારતની આયાત નિર્ભરતા ઘટાડવામાં ગેમ-ચેન્જર સાબિત થશે. મે મહિનાના પ્રથમ સપ્તાહમાં આ પ્રોસેસિંગ પ્લાન્ટ સંપૂર્ણપણે કાર્યરત થતા જ ભારત સોનાના ઉત્પાદન ક્ષેત્રે સ્વનિર્ભરતા તરફ મોટું ડગલું માંડશે.

આ મહત્વાકાંક્ષી પ્રોજેક્ટમાં ૪૦૦ કરોડ રૂપિયાથી વધુનું જંગી રોકાણ કરવામાં આવ્યું છે અને હાલમાં અહીં પ્રી-કોમર્શિયલ કામગીરી પૂરજોશમાં ચાલી રહી છે. રાજ્યના ખાણ અને ભૂસ્તરશાસ્ત્ર વિભાગે આ ઘટનાને ભારત માટે એક 'ઐતિહાસિક ક્ષણ' ગણાવી છે. આંધ્રપ્રદેશના મુખ્યમંત્રી એન. ચંદ્રબાબુ નાયડુ આ ખાનગી સુવર્ણ એકમ રાષ્ટ્રને સમર્પિત કરે તેવી પ્રબળ શક્યતાઓ સેવાઈ રહી છે. આ પ્રોજેક્ટ માત્ર રાજ્યના જીડીપીમાં વધારો નહીં કરે પરંતુ વૈશ્વિક સ્તરે સોનાના ભાવમાં થતી વધઘટ સામે ભારતને આર્થિક સુરક્ષા કવચ પણ પૂરું પાડશે. ખાણકામ શરૂ થતાની સાથે જ કુર્નૂલ વિસ્તારના અર્થતંત્રમાં પ્રાણ ફૂંકાશે અને રોજગારીની હજારો તકોનું સર્જન થશે.

વિશ્વ જ્યારે તેલના ભાવ અને આર્થિક અનિશ્ચિતતાઓ સામે ઝઝૂમી રહ્યું છે, ત્યારે ભારતને મળેલો આ કુદરતી ખજાનો વિદેશી હૂંડિયામણ બચાવવામાં રામબાણ ઈલાજ સમાન બનશે. પ્રોસેસિંગ પ્લાન્ટની આધુનિક ટેકનોલોજી દ્વારા સોનાના નિષ્કર્ષણની પ્રક્રિયાને અત્યંત ચોકસાઈથી હાથ ધરવામાં આવશે, જેનાથી પર્યાવરણને ન્યૂનતમ નુકસાન થાય તેવું આયોજન છે. ડોલરના પ્રવાહને રોકવા અને દેશની અંદર જ સોનાનું ઉત્પાદન વધારવાની કેન્દ્ર સરકારની નીતિને આ પ્રોજેક્ટથી મોટું બળ મળશે. મે મહિનાની આતુરતાથી રાહ જોવાઈ રહી છે, કારણ કે આ એકમ કાર્યરત થતા જ ભારતની 'સોનાની ચીડિયા' તરીકેની ઓળખ વધુ મજબૂત બનશે.