ન્યુ જર્સી: તા.૨૦ ફૂટબોલના મહાકુંભ એટલે કે ફીફા (FIFA) વર્લ્ડ કપ ૨૦૨૬ની આતુરતાથી રાહ જોઈ રહેલા ચાહકો માટે એક આંચકાજનક સમાચાર આવ્યા છે. અમેરિકાના ન્યુ જર્સીમાં આવેલ મેટલાઇફ સ્ટેડિયમ ખાતે મેચ જોવા જનારા લોકોએ હવે ટ્રેનની મુસાફરી માટે કલ્પી ન શકાય તેટલું ઊંચું ભાડું ચૂકવવું પડશે. ન્યુ જર્સી ટ્રાન્ઝિટે જાહેરાત કરી છે કે વર્લ્ડ કપ દરમિયાન રાઉન્ડ ટ્રીપ માટે ટ્રેનનું ભાડું $૧૫૦ (આશરે ₹૧૨,૫૦૦) રહેશે, જે સામાન્ય દિવસોના $૧૨.૯૦ કરતા લગભગ ૧૨ ગણું વધારે છે.
૧૫ મિનિટની મુસાફરી અને આટલો મોટો ખર્ચ!
ન્યુ યોર્કના પેન સ્ટેશનથી મેટલાઇફ સ્ટેડિયમ પહોંચવામાં ટ્રેનમાં માત્ર ૧૫ મિનિટ જેટલો સમય લાગે છે. સામાન્ય રીતે આ મુસાફરી ખૂબ સસ્તી હોય છે, પરંતુ વર્લ્ડ કપ દરમિયાન અપેક્ષિત ૪૦,૦૦૦થી વધુ ચાહકોના ધસારાને પહોંચી વળવા અને ઓપરેશનલ ખર્ચને રિકવર કરવા માટે આ ભાવવધારો ઝીંકવામાં આવ્યો છે. આ સ્ટેડિયમમાં ૧૯ જુલાઈના રોજ ફાઈનલ સહિત કુલ ૮ મેચો રમાવાની છે.
ગવર્નરે કર્યો બચાવ: "ફીફા ખર્ચ નથી ઉઠાવતું"
ન્યુ જર્સીના ગવર્નર મિકી શેરિલે આ આકરા ભાવવધારાનો બચાવ કરતા જણાવ્યું હતું કે, "અમે સ્થાનિક કરદાતાઓ પર આ ટુર્નામેન્ટનો આર્થિક બોજ નાખવા માંગતા નથી." NJ ટ્રાન્ઝિટના મતે, આ આયોજન માટે $૬૨ મિલિયનનો ખર્ચ થશે, જેની સામે બહારથી માત્ર $૧૪ મિલિયન જ મળી રહ્યા છે. ગવર્નરે સ્પષ્ટ આક્ષેપ કર્યો છે કે ફીફા પરિવહન ખર્ચમાં કોઈ ફાળો આપી રહ્યું નથી, તેથી અમારે મુસાફરો પાસેથી આ રકમ વસૂલવી પડી રહી છે.
ફીફા વિરુદ્ધ ન્યુ જર્સી સરકાર
આ મામલે ફીફાએ આશ્ચર્ય વ્યક્ત કરતા જણાવ્યું હતું કે અગાઉના કરારોમાં ચાહકો માટે મફત કે સસ્તા પરિવહનની જોગવાઈ હતી. બીજી તરફ ન્યુ યોર્કના ગવર્નર કેથી હોચુલે પણ આ વધારાની ટીકા કરતા કહ્યું છે કે ટૂંકી મુસાફરી માટે $૧૦૦થી વધુ ચાર્જ લેવો તે અતિશય છે. સ્ટેડિયમ નજીક પાર્કિંગના ભાવ પણ આસમાને પહોંચ્યા છે, જ્યાં એક કાર પાર્ક કરવા માટે $૨૨૫ (આશરે ₹૧૮,૭૦૦) ચૂકવવા પડી શકે છે.
અન્ય શહેરોમાં સ્થિતિ અલગ
રસપ્રદ વાત એ છે કે જ્યારે ન્યુ જર્સીમાં ભાવવધારો થયો છે, ત્યારે લોસ એન્જલસ, હ્યુસ્ટન અને કેન્સાસ સિટી જેવા યજમાન શહેરોએ ભાડામાં કોઈ મોટો ફેરફાર કર્યો નથી. હ્યુસ્ટનમાં આજે પણ બસ અને રેલ ભાડું માત્ર $૧.૨૫ થી $૪.૫૦ ની વચ્ચે છે. આ વિરોધાભાસને કારણે ફૂટબોલ પ્રેમીઓમાં ભારે રોષ જોવા મળી રહ્યો છે.
ખર્ચની સરખામણી:
•    સામાન્ય ભાડું: $૧૨.૯૦ (આશરે ₹૧,૦૭૦)
•    વર્લ્ડ કપ ભાડું: $૧૫૦ (આશરે ₹૧૨,૫૦૦)
•    પાર્કિંગ ખર્ચ: $૨૨૫ (આશરે ₹૧૮,૭૦૦)
•    મુસાફરીનો સમય: માત્ર ૧૫ મિનિટ