મુંબઈ : રિઝર્વ બેંક ઓફ ઇન્ડિયા (RBI) ના ગવર્નર સંજય મલ્હોત્રાએ મંગળવારે જણાવ્યું હતું કે, ફિનટેક ક્ષેત્રે ભારતની વિશાળ અને વૈવિધ્યસભર વસ્તીને દેશના ઔપચારિક નાણાકીય માળખા સાથે ઝડપી, સસ્તા અને અત્યંત સુરક્ષિત રીતે જોડવામાં યુગપરિવર્તક ભૂમિકા ભજવી છે. ગ્લોબલ ફિનટેક ફેસ્ટ (GFF) ૨૦૨૬ માં સંબોધન કરતાં તેમણે ઉમેર્યું હતું કે ફિનટેક કંપનીઓએ સામાન્ય નાગરિકોના ગ્રાહક અનુભવ, નાણાકીય માળખાકીય સુવિધાઓ અને ક્રેડિટ સિસ્ટમમાં અભૂતપૂર્વ પરિવર્તન આણ્યું છે.

મુંબઈ ખાતે આયોજિત આ વૈશ્વિક મંચ પર બોલતા RBI ગવર્નરે સ્પષ્ટ કર્યું કે, ફિનટેકની મદદથી બેંક ખાતા ખોલવા અને પેમેન્ટ સેટલમેન્ટનો સમય નોંધપાત્ર રીતે ઘટ્યો છે. એટલું જ નહીં, આર્ટિફિશિયલ ઇન્ટેલિજન્સ (AI) આધારિત એનાલિટિક્સના ઉપયોગથી બેંકિંગ છેતરપિંડીઓ ઓળખવાની અને તેને રોકવાની ક્ષમતા વધુ મજબૂત બની છે. તેમણે ખાસ કરીને સૂક્ષ્મ, નાના અને મધ્યમ ઉદ્યોગો (MSMEs) ને યુનિફાઇડ લેન્ડિંગ ઇન્ટરફેસ અને એકાઉન્ટ એગ્રીગેટર્સ દ્વારા સરળતાથી ધિરાણ પૂરું પાડવા બદલ ફિનટેકના યોગદાનની પ્રશંસા કરી હતી.

જવાબદાર નવીનતા અને PM મોદીના નેતૃત્વની સરાહના

રિઝર્વ બેંકના અભિગમ વિશે વાત કરતા ગવર્નરે જણાવ્યું કે, "અમે નવા વિચારો અને નવા સાહસિકો માટે હંમેશા ખુલ્લા છીએ. નાણાકીય ક્ષેત્રનો પાયો 'વિશ્વાસ' પર ટકેલો છે, અને અમે તે વિશ્વાસનું રક્ષણ કરવાની સાથે જવાબદાર નવીનતા (Responsible Innovation) ને સતત પ્રોત્સાહન આપી રહ્યા છીએ." તેમણે ફિનટેક ફેસ્ટમાં વડાપ્રધાન નરેન્દ્ર મોદીની સતત ત્રીજા વર્ષે પ્રેરણાદાયી ઉપસ્થિતિ બદલ આભાર માનતા કહ્યું કે, વડાપ્રધાનના દૂરંદેશી નેતૃત્વના કારણે જ ભારત આજે વિશ્વમાં ડિજિટલ રિવોલ્યુશનનું નેતૃત્વ કરી રહ્યું છે.

૧ લાખથી વધુ ડેલિગેટ્સનો મહાસંગમ

GFF ૨૦૨૬ ના ચેરમેન અને ઇન્ફોસિસના સહ-સ્થાપક ક્રિસ ગોપાલકૃષ્ણને જણાવ્યું હતું કે આ વર્ષના ફેસ્ટિવલમાં વિશ્વભરમાંથી ૧,૦૦૦,૦૦ થી વધુ પ્રતિનિધિઓ, ૮,૦૦૦ થી વધુ સહભાગી સંસ્થાઓ, ૧,૨૦૦ થી વધુ વક્તાઓ અને ૫૦૦ થી વધુ રોકાણકારો ભાગ લઈ રહ્યા છે. આ પરિષદ ભારતના બેંકિંગ અને ટેકનોલોજી ભવિષ્યને નવી ઊંચાઈઓ પર લઈ જવા માટે એક મહત્વપૂર્ણ માધ્યમ સાબિત થશે.