ઓસ્લો (નોર્વે): વૈશ્વિક ગ્રીન એનર્જી અને ટકાઉ વિકાસ (સસ્ટેનેબલ ડેવલપમેન્ટ) ની દિશામાં ભારત અને નોર્વેએ એક ખુબ જ ઐતિહાસિક કદમ ઉઠાવ્યું છે. નોર્વેની રાજધાની ઓસ્લો ખાતે ભારતના વડાપ્રધાન નરેન્દ્ર મોદી અને નોર્વેના વડાપ્રધાન જોનાસ ગાહર સ્ટોરે વચ્ચે એક અત્યંત મહત્વપૂર્ણ પ્રતિબંધિત અને પ્રતિનિધિમંડળ સ્તરની બેઠક યોજાઈ હતી. આ હાઈ-પ્રોફાઈલ વાટાઘાટો દરમિયાન બંને દિગ્ગજ નેતાઓએ ભારત-નોર્વેના દ્વિપક્ષીય સંબંધોને સર્વોચ્ચ સ્તરે લઈ જઈને 'ગ્રીન સ્ટ્રેટેજિક પાર્ટનરશિપ' (હરિત વ્યૂહાત્મક ભાગીદારી) માં બદલવાનો મોટો નિર્ણય કર્યો છે. આ નિર્ણય વૈશ્વિક ક્લાઈમેટ ચેન્જ સામેની લડાઈ અને ગ્રીન ટ્રાન્ઝિશન (હરિત સંક્રમણ) માટે ગેમ-ચેન્જર સાબિત થશે.

વેપાર, સ્પેસ અને AI ક્ષેત્રે સાથે મળીને કામ કરશે બંને દેશો

આ ઐતિહાસિક મુલાકાત દરમિયાન બંને વડાપ્રધાનોએ પરસ્પર વેપાર અને રોકાણના તમામ પાસાઓની ગંભીર સમીક્ષા કરી હતી. ભારત અને નોર્વે હવે ક્લીન એનર્જી, બ્લુ ઇકોનોમી (દરિયાઈ અર્થતંત્ર), સર્ક્યુલર ઇકોનોમી, રિન્યુએબલ એનર્જી, ઉચ્ચ શિક્ષણ, વિજ્ઞાન અને ટેકનોલોજી, આર્ટિફિશિયલ ઇન્ટેલિજન્સ (AI), સ્પેસ (અવકાશ સંશોધન) અને વ્યૂહાત્મક રીતે મહત્વપૂર્ણ એવા આર્કટિક ક્ષેત્રમાં સાથે મળીને સંશોધનો કરશે. આ ઉપરાંત, ગયા વર્ષે અમલમાં આવેલા ભારત-EFTA (યુરોપિયન ફ્રી ટ્રેડ એસોસિએશન) વેપાર કરારથી બંને દેશોમાં ટેકનોલોજી ટ્રાન્સફર અને લાખો નવી રોજગારીની તકો ઊભી થશે તે અંગે પણ નેતાઓએ ઉત્સાહ વ્યક્ત કર્યો હતો.

આતંકવાદના મુશ્કેલ સમયમાં સાચી મિત્રતાની પરખ થઈ: પીએમ મોદી

બંને નેતાઓએ વાટાઘાટો બાદ એક સંયુક્ત પ્રેસ કોન્ફરન્સને સંબોધિત કરી હતી. આ દરમિયાન પીએમ મોદીએ એક ભાવુક યાદ તાજી કરતા જણાવ્યું હતું કે, તેઓ ગયા વર્ષે જ નોર્વેની સત્તાવાર મુલાકાતે આવવાના હતા, પરંતુ જમ્મુ-કાશ્મીરના પહેલગામમાં થયેલા કાયરતાપૂર્ણ આતંકવાદી હુમલાને કારણે તેમણે પ્રવાસ મુલતવી રાખવો પડ્યો હતો. પીએમ મોદીએ ભારપૂર્વક કહ્યું કે, તે મુશ્કેલ અને કટોકટીના સમયગાળા દરમિયાન આતંકવાદ વિરુદ્ધ ભારતની પડખે મજબૂતીથી ઊભા રહીને નોર્વેએ પોતાની સાચી અને અતૂટ મિત્રતાનો પરિચય આપ્યો હતો, જેના માટે ભારત હંમેશા કૃતજ્ઞ રહેશે. નોર્વેના પીએમ સ્ટોરે પણ આતંકવાદ સામેની વૈશ્વિક લડાઈમાં ભારતને પોતાનું સંપૂર્ણ સમર્થન જાહેર કર્યું છે.

યુદ્ધથી કોઈ ઉકેલ નહીં આવે, સંવાદ જ એકમાત્ર રસ્તો: વૈશ્વિક પરિસ્થિતિ પર મંથન

વિશ્વભરમાં ચાલી રહેલા તણાવ વચ્ચે, ભારતના વડાપ્રધાને 'ઇન્ડો-પેસિફિક મહાસાગર પહેલ' માં જોડાવાના નોર્વેના નિર્ણયને આવકાર્યો હતો. તેમણે સ્પષ્ટ શબ્દોમાં જણાવ્યું હતું કે, ભારત અને નોર્વે બંને લોકતાંત્રિક દેશો નિયમો-આધારિત આંતરરાષ્ટ્રીય વ્યવસ્થા, સંવાદ અને રાજદ્વારી (ડિપ્લોમેસી) માં દ્રઢ વિશ્વાસ ધરાવે છે.

યુક્રેન સંકટ અને મિડલ ઈસ્ટ (પશ્ચિમ એશિયા) ની સળગતી પરિસ્થિતિઓનો ઉલ્લેખ કરતા પીએમ મોદીએ દુનિયાને મોટો સંદેશ આપ્યો કે, "કોઈપણ મુદ્દા કે વિવાદનો ઉકેલ ક્યારેય લશ્કરી સંઘર્ષ કે યુદ્ધ દ્વારા લાવી શકાતો નથી." બંને દેશોએ આ વૈશ્વિક વિસ્તારોમાં વહેલી તકે શાંતિ સ્થાપવા માટેના તમામ આંતરરાષ્ટ્રીય પ્રયાસોને ટેકો આપવાની પ્રતિબદ્ધતા દોહરાવી હતી. તેમજ, બદલાતા સમય સાથે સંયુક્ત રાષ્ટ્ર (UN) જેવી વૈશ્વિક સંસ્થાઓમાં તાત્કાલિક સુધારાની જરૂરિયાત પર પણ ભાર મૂક્યો હતો.