મુરેના, તા.૦૨: જુસ્સો, ધીરજ અને સતત સંઘર્ષની એક એવી અદ્ભુત વાર્તા સામે આવી છે જે ન્યાયિક પ્રક્રિયા અને દેશપ્રેમનું અનન્ય ઉદાહરણ પૂરું પાડે છે. મધ્ય પ્રદેશના મુરેના જિલ્લાના છિચવલી ગામના રહેવાસી ગિરવરસિંહ તોમર (જેઓ પાછળથી ગિરવરદાસ મહારાજ તરીકે ઓળખાયા) ૨૬ વર્ષ લાંબી કાનૂની લડાઈ જીતીને ફરી એકવાર સેન્ટ્રલ રિઝર્વ પોલીસ ફોર્સ (CRPF) માં જવાન તરીકે ફરજ પર પરત ફર્યા છે.

ગિરવર સિંહ ૧૯૯૧ માં CRPF માં જોડાયા હતા. પરંતુ ૧૯૯૯ માં એક વરિષ્ઠ અધિકારી સાથે થયેલા વિવાદ બાદ તેમને ૨૧ ઓક્ટોબર, ૧૯૯૯ ના રોજ સેવામાંથી બરતરફ કરવામાં આવ્યા હતા. આંચકામાંથી બહાર આવવા માટે તેમણે પોતાના ગામ નજીકના બરાહદ્વારી મંદિર અને ત્યારબાદ ગુફા મંદિરમાં આશરો લીધો હતો. જ્યાં તેમણે સંતત્વ અપનાવ્યું અને તેમને 'ગિરવરદાસ મહારાજ' નામ આપવામાં આવ્યું. સંત બન્યા હોવા છતાં તેમણે ખાખી ગણવેશ અને પોતાની ગરિમા પાછી મેળવવા માટેની કાનૂની લડાઈ ચાલુ રાખી હતી.

અલ્હાબાદ હાઈકોર્ટનો ઐતિહાસિક આદેશ અને નવી પોસ્ટિંગ

૧૯૯૯ માં તેમણે અલ્હાબાદ હાઈકોર્ટના દરવાજા ખટખટાવ્યા હતા. ૨૦૦૭ માં તેમની તરફેણમાં ચુકાદો આવ્યા બાદ વિભાગીય સ્ટે અને ડબલ બેન્ચની અપીલને કારણે આ કેસ વર્ષો સુધી લંબાયો હતો. આખરે અદાલતના આકરા વલણ બાદ ૨૬ ઓગસ્ટ, ૨૦૨૬ ના રોજ CRPF એ ૨૬ વર્ષ જૂના આ કેસમાં ગિરવર સિંહને સેવામાં પુનઃસ્થાપિત કરવાનો આદેશ જારી કર્યો છે. ૨૬ વર્ષ પહેલાં વર્ધી ઉતારીને સાધુનું જીવન જીવનારા ગિરવર સિંહને હવે છત્તીસગઢના બીજાપુરમાં પોસ્ટિંગ આપવામાં આવ્યું છે, જ્યાં તેઓ આ ઉંમરે પણ ફરીથી દેશની રક્ષા માટે તૈનાત થશે.