જયપુર: દેશની સૌથી પ્રતિષ્ઠિત ગણાતી મેડિકલ પ્રવેશ પરીક્ષા NEET (UG) 2026 ફરી એકવાર મોટા વિવાદના વમળમાં ફસાઈ છે. ૩ મેના રોજ લેવાયેલી આ પરીક્ષામાં પેપર લીક થયું હોવાના પુરાવા મળતા સમગ્ર દેશમાં હડકંપ મચી ગયો છે. રાજસ્થાન પોલીસના સ્પેશિયલ ઓપરેશન્સ ગ્રુપ (SOG)ની પ્રાથમિક તપાસમાં બહાર આવ્યું છે કે પરીક્ષાના બે દિવસ પહેલા જ એક નકલી "ગેસ પેપર" સોશિયલ મીડિયા પર વાયરલ થયું હતું, જેમાંથી ૧૪૦ પ્રશ્નો અસલી પેપરમાં બેઠા પૂછાયા છે. આ ઘટનાએ ૨૦૨૪ના ભયાનક પેપર લીક કાંડની યાદ તાજી કરી દીધી છે.
 
૬૦૦ માર્ક્સનો સીધો ફાયદો: મેરિટમાં ઉથલપાથલની શક્યતા
NEET-UG પરીક્ષા કુલ ૭૨૦ માર્ક્સની હોય છે. તપાસ મુજબ, જે ૩૦૦ પ્રશ્નો વાળું લિસ્ટ વાયરલ થયું હતું, તેમાંથી ૧૪૦ પ્રશ્નો અસલી પરીક્ષામાં આવ્યા હતા. જો કોઈ વિદ્યાર્થીએ માત્ર આ પ્રશ્નો જ વાંચ્યા હોય, તો તેને સીધા ૫૬૦ થી ૬૦૦ ગુણનો ફાયદો થઈ શકે છે. સૌથી વધુ ચોંકાવનારી વાત એ છે કે પ્રશ્નોની સાથે સાથે તેના જવાબના વિકલ્પો (Option Sequence) પણ અસલી પેપર સાથે હૂબહૂ મળતા આવ્યા છે, જે સંકેત આપે છે કે આ કોઈ અકસ્માત નથી પણ પૂર્વ-આયોજિત કાવતરું છે.
 
MBBS વિદ્યાર્થીથી લઈને કોચિંગ સેન્ટર્સ સુધી ફેલાયેલું જાળ
આ કૌભાંડના તાર કેરળની એક મેડિકલ કોલેજમાં અભ્યાસ કરતા રાજસ્થાનના ચુરુ જિલ્લાના એક MBBS વિદ્યાર્થી સુધી પહોંચ્યા છે. આ વિદ્યાર્થીએ ૧ મેના રોજ સીકરમાં રહેતા તેના મિત્રને આ પેપર મોકલ્યું હતું. ત્યારબાદ આ પેપર પળવારમાં કોચિંગ સેન્ટરો, પીજી હોસ્ટેલો અને કરિયર કાઉન્સેલિંગના વોટ્સએપ ગ્રુપોમાં હજારો વિદ્યાર્થીઓ સુધી પહોંચી ગયું હતું.
શરૂઆતમાં આ પેપર ૨ લાખ રૂપિયા સુધીમાં વેચાતું હતું, પરંતુ પરીક્ષાના થોડા કલાકો પહેલા તેની કિંમત ઘટીને માત્ર ૩૦,૦૦૦ રૂપિયા સુધી પહોંચી ગઈ હતી. આનાથી સ્પષ્ટ થાય છે કે પેપર લીક કરનારાઓએ મોટા પાયે આર્થિક ગેરરીતિ આચરી છે.
 
NTA અને SOG ની કાર્યવાહી
નેશનલ ટેસ્ટિંગ એજન્સી (NTA) એ સ્વીકાર્યું છે કે તેમને આ ગેરરીતિની જાણકારી છે. NTA એ જણાવ્યું કે રાજસ્થાન SOG નો અંતિમ રિપોર્ટ આવ્યા બાદ કડક પગલાં લેવામાં આવશે. હાલમાં હજારો વિદ્યાર્થીઓ અને વાલીઓ સોશિયલ મીડિયા પર ફરીથી પરીક્ષા (Re-exam) લેવાની માંગ કરી રહ્યા છે. જો ૧૪૦ પ્રશ્નો ખરેખર લીક થયા હોય, તો પ્રમાણિકતાથી તૈયારી કરનાર વિદ્યાર્થીઓ માટે મેડિકલમાં એડમિશન મેળવવું અશક્ય બની જશે.
હવે સૌની નજર SOG ના અંતિમ અહેવાલ અને સરકારના નિર્ણય પર ટકેલી છે. શું લાખો વિદ્યાર્થીઓની મહેનત એળે જશે કે પછી ન્યાય થશે? તે જોવાનું રહ્યું.