મુંબઈ: ભારતીય સંગીત જગતનો એક ઝળહળતો સિતારો કાયમ માટે આથમી ગયો છે. સૂર અને લયની રાણી ગણાતા આશા ભોસલેએ ૯૨ વર્ષની વયે આ દુનિયાને કાયમ માટે અલ્વિદા કહી દીધું છે. ૧૨ એપ્રિલના રોજ મુંબઈની બ્રીચ કેન્ડી હોસ્પિટલમાં તેમણે અંતિમ શ્વાસ લીધા હતા. આજે ૧૪ એપ્રિલના રોજ મુંબઈના ઐતિહાસિક શિવાજી પાર્ક ખાતે સંપૂર્ણ રાજકીય સન્માન સાથે આ મહાન ગાયિકાને અંતિમ વિદાય આપવામાં આવી હતી. આશાતાઈના જવાથી માત્ર બોલિવૂડ જ નહીં, પણ વિશ્વભરના સંગીત પ્રેમીઓમાં શોકનું મોજું ફરી વળ્યું છે.
બીમારીમાં પણ જીવંત હતી યુવતી જેવી સ્ફૂર્તિ
પ્રખ્યાત ગઝલ ગાયક તલત અજીઝ, જેઓ આશાતાઈની ખૂબ નજીક હતા, તેમણે અત્યંત ભાવુક થઈને તેમની છેલ્લી મુલાકાતને યાદ કરી હતી. તલત અજીઝે જણાવ્યું કે, "તેઓ ભલે ૯૨ વર્ષના હતા, પણ દિલથી હંમેશા ૨૨ વર્ષની યુવતી જેવા જ જીવંત અને ઉત્સાહી હતા. છેલ્લી વાર જ્યારે તેમની સાથે ફોન પર વાત થઈ, ત્યારે તેઓ બીમાર હોવા છતાં મને ગીત ગાઈને સંભળાવતા હતા અને પૂછતા હતા કે - 'તલત, મારો અવાજ કેવો લાગે છે?' બીમારીમાં પણ તેમના સૂર જરાય ડગ્યા નહોતા, તે જોઈને હું આશ્ચર્યચકિત થઈ ગયો હતો."
અધૂરી રહી ગઈ છેલ્લી મુલાકાતની ઈચ્છા
તલત અજીઝે વધુમાં ઉમેર્યું કે આશાતાઈ તેમને મળવા માટે ખૂબ આતુર હતા. તેમણે કહ્યું હતું કે, "જ્યારે તું મોરિશિયસથી પાછો આવે ત્યારે આપણે નિરાંતે બેસીશું અને જૂની વાતો કરીશું." તલત અજીઝ ૯-૧૦ એપ્રિલે પાછા તો આવ્યા, પણ કમનસીબે ૧૧ તારીખે તેમને સમાચાર મળ્યા કે આશાતાઈની તબિયત અત્યંત નાજુક છે અને ૧૨ તારીખે આ દિલ તોડી નાખનારા સમાચાર મળી ગયા. આશાતાઈ સાથેનો તેમનો અને તેમની પત્નીનો પારિવારિક સંબંધ આ નિધનથી એક મોટો સદમો બની ગયો છે.
સંગીતનો એક યુગ પૂરો થયો
આશા ભોસલેએ ૧૯૪૦ના દાયકાથી શરૂ કરીને દાયકાઓ સુધી પોતાના અવાજથી દુનિયાને ઘેલું લગાડ્યું હતું. શાસ્ત્રીય સંગીત હોય કે આધુનિક પૉપ, દરેક શૈલીમાં તેમણે પોતાની અમીટ છાપ છોડી છે. ૧૨ માર્ચથી હોસ્પિટલમાં દાખલ આશાતાઈએ અંત સમય સુધી સંગીત પ્રત્યેનો પોતાનો પ્રેમ જાળવી રાખ્યો હતો. આજે શિવાજી પાર્ક ખાતે અનેક રાજકીય હસ્તીઓ અને ફિલ્મી સિતારાઓની હાજરીમાં તેમને અશ્રુભીની આંખે વિદાય આપવામાં આવી.
આશાતાઈ ભલે આજે આપણી વચ્ચે નથી, પણ તેમનો જાદુઈ અવાજ 'પિયા તૂ અબ તો આજા' થી લઈને ભાવુક ગીતો સુધી હંમેશા ગુંજતો રહેશે. સંગીત જગતમાં પડેલી આ ખોટ ક્યારેય પુરાશે નહીં.