મૈત્રી સ્ટેશન (એન્ટાર્કટિકા) : ઘર અને પરિવારથી હજારો કિલોમીટર દૂર વિશ્વના સૌથી વિષમ અને દુર્ગમ વાતાવરણમાં રહીને કામ કરવું અત્યંત પડકારજનક હોય છે, પરંતુ જ્યારે હૃદયમાં ભક્તિ અને સંસ્કૃતિ પ્રત્યેનો પ્રેમ હોય ત્યારે કોઈ પણ અંતર કે વિષમતા આડે આવતી નથી. એન્ટાર્કટિકાના બરફીલા ખંડ પર સ્થિત ભારતના 'મૈત્રી સંશોધન મથક' (Maitri Station) પર તૈનાત ભારતીય વૈજ્ઞાનિકોની ટીમે આ વાત સાબિત કરી બતાવી છે. તેમણે એન્ટાર્કટિકાના શૂન્યથી નીચેના તાપમાનમાં પોતાની આસપાસ રહેલા બરફનો જ ઉપયોગ કરીને ભગવાન ગણેશની અતિ મનોહર પ્રતિમા કંડારીને અનોખા અંદાજમાં ગણેશ ચતુર્થીની ઉજવણી કરી છે.

નેશનલ સેન્ટર ફોર પોલર એન્ડ ઓશન રિસર્ચ (NCPOR) ના સંશોધક અનિરુદ્ધ ધારે પોતાના સોશિયલ મીડિયા એકાઉન્ટ પર આ અદ્ભુત ક્ષણોનો વીડિયો શેર કર્યો છે. વીડિયોમાં જોઈ શકાય છે કે વૈજ્ઞાનિકોએ અત્યંત કાળજીપૂર્વક બરફને આકાર આપીને ગણેશજીની કલાત્મક મૂર્તિ બનાવી હતી. ત્યારબાદ તેને રંગબેરંગી ફૂલો અને પુષ્પમાળાઓથી શણગારીને પરંપરાગત ઉત્સવનો રૂપ આપ્યો હતો. સંશોધન સ્ટેશનની અંદર જ મંત્રોચ્ચાર, તાળીઓના ગડગડાટ અને શ્રદ્ધાપૂર્વકની વિધિઓ સાથે મહારાષ્ટ્ર અને ભારતની વર્ષો જૂની પરંપરાને એન્ટાર્કટિકાના વાતાવરણમાં જીવંત કરવામાં આવી હતી.

પૂજા-અર્ચના બાદ વૈજ્ઞાનિકોએ ગણપતિ બાપ્પાના જય ઘોષ સાથે મૂર્તિનું 'ઇકો-ફ્રેન્ડલી' વિસર્જન પણ કર્યું હતું. અનિરુદ્ધે આ પ્રસંગને ભારતથી આશરે ૧૫,૦૦૦ કિલોમીટર દૂર "ઈકો-ફ્રેન્ડલી વિસર્જન" ના એક નવા જ શિખર તરીકે વર્ણવ્યો હતો, કારણ કે બરફની બનાવેલી મૂર્તિ કુદરતી રીતે જ વિલીન થઈ ગઈ હતી. પૂજા સંપન્ન થયા બાદ તમામ વૈજ્ઞાનિકોએ સાથે મળીને હાથે બનાવેલા સ્વાદિષ્ટ મોદકનો આસ્વાદ માણ્યો હતો. સોશિયલ મીડિયા પર આ વીડિયો વાયરલ થતાં જ દેશવાસીઓએ વૈજ્ઞાનિકોની દેશભક્તિ, સંસ્કૃતિ પ્રત્યેના પ્રેમ અને કળાની મુક્તકંઠે પ્રશંસા કરી છે.