મુંબઈ: મુંબઈના આંતરરાષ્ટ્રીય એરપોર્ટ પર કસ્ટમ્સ અને ડિરેક્ટોરેટ ઓફ રેવન્યુ ઇન્ટેલિજન્સ (DRI) ના અસલી અધિકારીઓ હોવાનો દાવો કરીને વિદેશી મુસાફરો પાસેથી પૈસા અને કિંમતી વસ્તુઓ પડાવી લેતી એક નકલી ખંડણીખોર ગેંગનો પર્દાફાશ થયો છે. પ્રવાસીઓને તપાસ અને દંડની ભારે ધમકીઓ આપીને લૂંટ ચલાવતા આ ત્રિપુટીને મુંબઈની સહાર પોલીસે ઝડપી પાડી છે, જેમના કબજામાંથી નકલી સરકારી ઓળખ કાર્ડ પણ જપ્ત કરવામાં આવ્યા છે. આરોપીઓ દુબઈ અને બેંગકોકથી પરત ફરતા નિર્દોષ મુસાફરોને મુખ્યરૂપે પોતાના નિશાન બનાવતા હતા.

પોલીસ તપાસમાં બહાર આવ્યું છે કે ધરપકડ કરાયેલા આરોપીઓની ઓળખ મોહમ્મદ ઝોહૈબ ઉસ્માન બલોચ (ડિલિવરી એક્ઝિક્યુટિવ), ઝૈદ નદીમ શેખ (બીપીઓ કર્મચારી) અને સલિયા સઈદ અહેમદ કુરેશી (ટિફિન સર્વિસ સંચાલક) તરીકે થઈ છે. આ ત્રણેય આરોપીઓ પોતાને કસ્ટમ્સ અને ડીઆરઆઈના અધિકારીઓ તરીકે ઓળખાવીને આંતરરાષ્ટ્રીય પ્રવાસીઓના સામાનમાં પ્રતિબંધિત વસ્તુઓ કે ઇલેક્ટ્રોનિક ઉપકરણો હોવાની ખોટી ધાક બેસાડતા હતા. ત્યારબાદ તેઓ નકલી સરકારી ઓળખ કાર્ડ બતાવીને ડરાવી-ધમકાવીને નાણાં અને કિંમતી ચીજવસ્તુઓની માંગણી કરતા હતા.

દુબઈથી પરત ફરેલા મુમ્બ્રાના પ્રવાસી અમન હસન મિર્ઝા જ્યારે એરપોર્ટના P6 પાર્કિંગ વિસ્તારમાં પહોંચ્યા ત્યારે આ આરોપીઓએ તેમને રોકીને પાસપોર્ટ, મોબાઇલ અને બોર્ડિંગ પાસ છીનવી લીધા હતા અને પૂછપરછના બહાને હેરાનગતિ શરૂ કરી હતી. સદભાગ્યે, તે જ સમયે ત્યાં પેટ્રોલિંગ કરી રહેલા ટ્રાફિક પોલીસના એક સતર્ક કોન્સ્ટેબલે આ બબાલ જોઈને ત્વરિત દરમિયાનગીરી કરી હતી અને ત્રણેય નકલી અધિકારીઓને રંગેહાથ ઝડપી લીધા હતા. આરોપીઓ પાસેથી દિગ્વિજય પાટિલ નામના ફોટોવાળા ફેક આઈડી કાર્ડ પણ મળી આવ્યા હતા.

સહાર પોલીસે આ મામલે ગુનો નોંધીને વધુ તપાસ શરૂ કરી છે કે આ ગેંગ અગાઉ કેટલા મુસાફરોને શિકાર બનાવી ચૂકી છે અને આ કાવતરામાં અન્ય કોણ સંકળાયેલું છે. એરપોર્ટ પર સુરક્ષા વ્યવસ્થાને વધુ કડક બનાવવા તેમજ આ પ્રકારે નકલી આઈકાર્ડ બનાવીને પ્રવાસીઓને લૂંટતી ગેંગના નેટવર્કને નેસ્તનાબૂદ કરવા માટે પોલીસે તપાસના ચક્રો વધુ ગતિમાન કર્યા છે.