નવી દિલ્હી: પશ્ચિમ એશિયામાં વધી રહેલા સંઘર્ષ અને રાજકીય અસ્થિરતાની સીધી અસર હવે વૈશ્વિક અર્થતંત્ર પર દેખાવા લાગી છે. અમેરિકા અને ઈરાન વચ્ચે શાંતિ પ્રસ્તાવ પર સર્જાયેલી અસંમતિને કારણે આજે આંતરરાષ્ટ્રીય બજારમાં કાચા તેલ (ક્રૂડ ઓઈલ) ના ભાવમાં 3 ટકાથી વધુનો તોતિંગ વધારો ઝીંકાયો છે. આ ઉછાળાને કારણે આગામી દિવસોમાં પેટ્રોલ અને ડીઝલના ભાવ વધવાની શક્યતાએ સમગ્ર વિશ્વની ચિંતા વધારી દીધી છે.

બજારમાં ભાવની સ્થિતિ

તાજા અહેવાલો મુજબ, વૈશ્વિક બેન્ચમાર્ક ગણાતું બ્રેન્ટ ક્રૂડ 3.2 ટકાના વધારા સાથે પ્રતિ બેરલ 107.53 યુએસ ડોલર પર પહોંચી ગયું છે. બીજી તરફ, અમેરિકન ક્રૂડ એટલે કે વેસ્ટ ટેક્સાસ ઇન્ટરમીડિયેટ (WTI) પણ 3.3 ટકા ઉછળીને પ્રતિ બેરલ 101.30 યુએસ ડોલર પર ટ્રેડ થઈ રહ્યું છે. ઓઈલ માર્કેટમાં આવેલી આ અચાનક તેજી પાછળ મુખ્ય કારણ તેલના પુરવઠામાં આવનારો સંભવિત અવરોધ માનવામાં આવી રહ્યો છે.

શા માટે વધ્યા ભાવ?

પશ્ચિમ એશિયામાં સંઘર્ષ વિરામ માટેના અમેરિકાના પ્રસ્તાવ સામે ઈરાને લીધેલા કડક વલણ અને બંને દેશો વચ્ચેના મતભેદોને કારણે બજારમાં ફાળ પડી છે. રોકાણકારોને ડર છે કે જો આ વિસ્તારમાં સ્થિતિ વધુ વણસશે, તો તેલ ઉત્પાદક દેશો પાસેથી મળતો પુરવઠો ઘટી શકે છે. આ અનિશ્ચિતતાએ તેલની કિંમતોને આસમાને પહોંચાડી દીધી છે.

ભારત પર શું થશે અસર?

ભારત તેની જરૂરિયાતનું મોટાભાગનું ક્રૂડ ઓઈલ આયાત કરે છે. આંતરરાષ્ટ્રીય બજારમાં તેલ મોંઘું થતા ભારતની આયાત કિંમત વધશે, જેના કારણે દેશમાં મોંઘવારીમાં વધારો થઈ શકે છે. પેટ્રોલ-ડીઝલના ભાવ વધવાથી પરિવહન ખર્ચ વધશે અને અંતે ખાવા-પીવાની ચીજવસ્તુઓ પણ મોંઘી થવાની ભીતિ છે.

આમ, પશ્ચિમ એશિયાનો જંગ હવે માત્ર સરહદ પૂરતો મર્યાદિત ન રહેતા સામાન્ય માણસના રસોડા સુધી પહોંચી રહ્યો હોય તેવું લાગી રહ્યું છે.