નવી દિલ્હી, તા.૨૧: ભારતમાં સ્કોચ વ્હિસ્કીના આયાત મૂલ્યમાં મોટા પાયે ગડબડ કરીને ટેક્સ ચોરી કરવાના કેસમાં ફ્રેન્ચ દારૂ ઉત્પાદક કંપની પર્નોડ રિકાર્ડ (Pernod Ricard) ને ભારે આંચકો લાગ્યો છે. ભારત સરકારની $૩૧૪ મિલિયન (આશરે રૂ. ૨,૭૦૦ કરોડ) ની જંગી ટેક્સ માંગ સામે દિલ્હી હાઈકોર્ટમાં દાખલ કરેલી પોતાની કાનૂની અરજી કંપનીએ પાછી ખેંચી લીધી છે. દિલ્હી હાઈકોર્ટના આદેશ બાદ હવે કંપનીએ આ મામલે ભારતીય કર કાયદા હેઠળ નિર્ધારિત અપીલ સિસ્ટમ દ્વારા જ આગળ વધવું પડશે.

આ સમગ્ર વિવાદ પર્નોડ રિકાર્ડ દ્વારા ભારતમાં આયાત કરવામાં આવતી સ્કોચ વ્હિસ્કીના કથિત 'અંડર-વેલ્યુએશન' (ઓછું મૂલ્યાંકન દર્શાવવું) સાથે જોડાયેલો છે. ભારતીય તપાસ એજન્સીઓએ આશરે ચાર વર્ષની લાંબી અને ઊંડી તપાસ બાદ સપ્ટેમ્બર ૨૦૨૫ માં કંપનીને આ કરોડો રૂપિયાની ટેક્સ નોટિસ ફટકારી હતી.

કોર્ટમાં કેમ પીછેહઠ કરવી પડી?

કંપનીએ શરૂઆતમાં દિલ્હી હાઈકોર્ટનો દરવાજો ખટખટાવીને દાવો કર્યો હતો કે ટેક્સ અધિકારીઓએ તેમને કેસનો બચાવ કરવા માટે જરૂરી તપાસ દસ્તાવેજો આપ્યા નથી. જોકે, દિલ્હી હાઈકોર્ટે નોંધ્યું હતું કે કાયદાકીય રીતે ઉપલબ્ધ વૈકલ્પિક આંતરિક અપીલ પ્રક્રિયાનો ઉપયોગ કરવા માટે પર્નોડે પોતાની અરજી સ્વેચ્છાએ પાછી ખેંચી લીધી છે.

ભારત પર્નોડ માટે સૌથી મોટું માર્કેટ

વિશ્વવિખ્યાત 'ચિવાસ રીગલ' (Chivas Regal) વ્હિસ્કી અને 'એબ્સોલ્યુટ વોડકા' (Absolut Vodka) બનાવતી પર્નોડ રિકાર્ડ માટે ભારત વોલ્યુમની દ્રષ્ટિએ વિશ્વનું સૌથી મોટું બજાર છે, જે તેના વૈશ્વિક વેચાણમાં ૧૦ ટકા જેટલો હિસ્સો ધરાવે છે. ટેક્સ વિવાદ ઉપરાંત કંપની દિલ્હીની વિવાદિત દારૂ નીતિ સાથે જોડાયેલી એન્ટિટ્રસ્ટ તપાસનો પણ સામનો કરી રહી છે, જેના કારણે ભારતમાં તેનો બિઝનેસ અત્યારે કાનૂની મુશ્કેલીઓના ઘેરાવમાં આવી ગયો છે.