કોચી : ભ્રષ્ટાચારના કેસમાં દોષિત ઠરેલા કેરળના ભૂતપૂર્વ પોલીસ મહાનિર્દેશક (DGP) ટોમિન જે. થાચનકારીની કસ્ટડી દરમિયાન હોસ્પિટલમાં દાખલ થવાની ઘટના અંગે કેરળ હાઈકોર્ટે ગુરુવારે અત્યંત કડક વલણ અપનાવીને ગંભીર શંકા વ્યક્ત કરી છે.

પ્રાપ્ત વિગતો અનુસાર, ન્યાયમૂર્તિ એ. બદરુદ્દીને સુનાવણી દરમિયાન નોંધ્યું હતું કે જેલમાં મોકલવામાં આવ્યાના થોડા સમયમાં જ હોસ્પિટલમાં દાખલ થઈ જવાથી અને ત્યારબાદ સજા સ્થગિત થવાથી પૂર્વ ડીજીપીએ જેલની કોટડીમાં ભાગ્યે જ કોઈ સમય વિતાવ્યો છે.

કોર્ટે આકરી ટિપ્પણી કરતા પ્રશ્ન ઉઠાવ્યો હતો કે જો થાચનકારી શ્વાસની ગંભીર બીમારીથી પીડાતા હોય અને હોસ્પિટલમાં સારવાર લેતા હોય, તો જામીન મળતાની સાથે જ તેઓ નોકરીના અર્થે દુબઈ જવા માટે પરવાનગી કેવી રીતે માંગી રહ્યા છે.

ન્યાયાધીશે આ સમગ્ર મામલે જેલના ડોક્ટરો અને અધિકારીઓની સંડોવણી તથા કાવતરાની આશંકા વ્યક્ત કરતા જણાવ્યું હતું કે પૂર્વ અધિકારીને કઈ બીમારી છે તેની સત્યતા ચકાસવા માટે મેડિકલ બોર્ડ સમક્ષ તેમની તપાસ કરાવવી અનિવાર્ય છે.

બીજી તરફ, કોર્ટના આકરા તેવર જોઈને થાચનકારીના વકીલે વિદેશ પ્રવાસની મંજૂરી માંગતી અરજી પાછી ખેંચવાની તૈયારી દર્શાવી હતી, પરંતુ ન્યાયાધીશે સ્પષ્ટ કર્યું હતું કે અરજી પાછી ખેંચવા છતાં આ ગંભીર વિસંગતતાની તપાસ અટકશે નહીં.

ઉલ્લેખનીય છે કે સપ્ટેમ્બરમાં ટ્રાયલ કોર્ટે તેમને ચાર વર્ષની સજા ફટકારી હતી, જેની સામે હાઈકોર્ટમાં અપીલ પેન્ડિંગ છે, ત્યારે હવે અદાલત દ્વારા પૂજાપ્પુરા સેન્ટ્રલ જેલના અધિક્ષક પાસેથી વિગતો મંગાવીને આગળની કાયદેસરની કાર્યવાહી હાથ ધરવામાં આવશે.