નવી દિલ્‍હીઃ ભારતીય શેરબજાર માટે રાહતના સમાચાર સામે આવ્યા છે. સતત ચાર મહિનાના જંગી વેચાણ બાદ, જુલાઈ મહિનામાં વિદેશી પોર્ટફોલિયો રોકાણકારો (FPI) ફરીથી ભારતીય બજારમાં ચોખ્ખા ખરીદદારો બન્યા છે. CDSL ના તાજેતરના ડેટા મુજબ, જુલાઈમાં અત્યાર સુધીમાં વિદેશી રોકાણકારોએ ભારતીય શેરોમાં ₹૧૫,૧૫૭ કરોડથી વધુનું રોકાણ કર્યું છે, જે બજાર માટે મોટું સકારાત્મક વળાંક ગણાય છે.

જૂનમાં વિદેશી રોકાણકારોએ ₹૪૯,૩૪૦ કરોડ, મેમાં ₹૩૨,૯૬૩ કરોડ, એપ્રિલમાં ₹૬૦,૮૪૭ કરોડ અને માર્ચમાં ₹૧.૧૭ લાખ કરોડ પાછા ખેંચી લીધા હતા. આ પહેલા, FPI એ ફેબ્રુઆરીમાં ભારતીય ઇક્વિટીમાં ₹૨૨,૬૧૫ કરોડનું રોકાણ કર્યું હતું. જોકે, ૨૦૨૬માં અત્યાર સુધીમાં કુલ આઉટફ્લો ₹૨.૬ લાખ કરોડ જેટલો ઊંચો રહ્યો છે, જે ૨૦૨૫ના સમાન ગાળા કરતા વધારે છે.

મોર્નિંગસ્ટારના હિમાંશુ શ્રીવાસ્તવે જણાવ્યું હતું કે વૈશ્વિક જોખમની ભાવનામાં સુધારો અને ભારતના મેક્રોઇકોનોમિક સૂચકાંકોમાં વિશ્વાસ વધવાથી આ રોકાણ આવ્યું છે. જિયોજિત ઇન્વેસ્ટમેન્ટ્સના વીકે વિજયકુમારે ઉમેર્યું હતું કે રૂપિયાની સ્થિરતા અને સેમિકન્ડક્ટર સેક્ટરમાં નબળાઈને કારણે અન્ય બજારોમાંથી મૂડી ખેંચી રોકાણકારો ભારતમાં રોકાણ કરી રહ્યા છે. ઉપરાંત, ડેટ માર્કેટમાં પણ ₹૯,૮૫૩ કરોડનું વધારાનું રોકાણ જોવા મળ્યું છે.

ભવિષ્યમાં વિદેશી રોકાણની ગતિ ભારતના સ્થાનિક આર્થિક વિકાસ અને વૈશ્વિક પરિસ્થિતિ પર નિર્ભર રહેશે. નિષ્ણાતો માને છે કે જો મેક્રોઇકોનોમિક સુધારા જળવાઈ રહેશે, તો આગામી સમયમાં ભારતીય બજારમાં વધુ રોકાણ આવવાની શક્યતા છે. રોકાણકારો માટે આ સ્થિતિ એક આશાસ્પદ સંકેત છે, જોકે બજારની અનિશ્ચિતતાઓને ધ્યાનમાં રાખીને સાવચેતીપૂર્વક આગળ વધવું જરૂરી રહેશે.