બેંગલુરુ, તા.૩1: સિલિકોન સિટી બેંગલુરુમાં પદયાત્રીઓની સુવિધા અને સુરક્ષા માટે એક અભૂતપૂર્વ ઝુંબેશ ચલાવવામાં આવી રહી છે. સુપ્રીમ કોર્ટ દ્વારા સીમાંકિત ફૂટપાથ પર ચાલવાના અધિકારને નાગરિકોનો મૂળભૂત અધિકાર જાહેર કર્યા બાદ, ગ્રેટર બેંગલુરુ ઓથોરિટી દ્વારા ૧ જુલાઈથી 'સેફ ફૂટપાથ ઝુંબેશ' શરૂ કરવામાં આવી હતી. આ અભિયાન હેઠળ માત્ર અઠવાડિયાઓમાં ૬૭૩.૭૧ કિલોમીટર લાંબા ફૂટપાથને દબાણો અને અવરોધોથી મુક્ત કરાવવામાં આવ્યા છે.
આ કાર્યવાહી દરમિયાન તંત્રે અત્યાર સુધીમાં આશરે ૨,૯૮૨ ટન કાટમાળ, ૫,૧૦૭ જાહેરાતના થાંભલા અને બોર્ડ, ૩,૧૬૫ અનધિકૃત પગથિયાં-રેમ્પ તથા ૨,૩૩૨ ગેરકાયદે દુકાનો અને કેબિનો હટાવી દીધી છે.
૧ ઓગસ્ટથી 'કચરા મુક્તિ' ઝુંબેશ: ૨૨,૭૦૦ ટન કાટમાળનો નિકાલ કરાશે
ફૂટપાથ મુક્ત કરાવ્યા બાદ હવે નાગરિક તંત્ર ૧ ઓગસ્ટથી 'કચરાથી મુક્તિ' ઝુંબેશ શરૂ કરવા જઈ રહ્યું છે. શહેરમાં ૧,૬૧૬ જેટલા એવા સ્થળોની ઓળખ કરવામાં આવી છે જ્યાં અંદાજે ૨૨,૭૩૨ ટન બાંધકામનો કાટમાળ અને કચરો પરાપૂર્વથી પડ્યો છે, જેને સંપૂર્ણપણે સાફ કરવામાં આવશે. આ ઉપરાંત ૧૮ જુલાઈથી રસ્તાઓ પર પડેલા ત્યજી દેવાયેલા વાહનોને પણ હટાવવાની કામગીરી ચાલી રહી છે.
સુપ્રીમ કોર્ટના ચુકાદાથી મળી પ્રેરણા
૧૯ જૂને સુપ્રીમ કોર્ટે મોટર વાહન અકસ્માતના એક કેસની સુનાવણી કરતી વખતે ટિપ્પણી કરી હતી કે, "સુરક્ષિત અને અવિરત ફૂટપાથ પૂરા પાડવા એ સ્થાનિક મ્યુનિસિપલ ઓથોરિટીની લઘુત્તમ ફરજ છે. ચાલવાનો અધિકાર એ નાગરિકોનો મૂળભૂત અધિકાર છે."
બેંગલુરુ વિકાસ મંત્રી કૃષ્ણ બાયરે ગૌડાએ જણાવ્યું હતું કે, ૨૦૨૩ થી અત્યાર સુધીમાં શહેરમાં ૯૩૧ માર્ગ અકસ્માતોમાં રાહદારીઓએ જીવ ગુમાવ્યા છે, તેથી પદયાત્રીઓની સુરક્ષા અમારી પ્રાથમિકતા છે. જો ૧ કિલોમીટર સુધીનો ફૂટપાથ ચાલવા યોગ્ય હશે તો લોકો વાહનો છોડીને ચાલવાનું પસંદ કરશે, જેનાથી ટ્રાફિકની સમસ્યામાં પણ મોટો ઘટાડો થશે.
'ઇન્ડિયન પેડેસ્ટ્રિયન લીગ' (IPL) ની અનોખી પહેલ:
બેંગલુરુના નાગરિક અરુણ પાઇ (જેઓ પોતાને 'ફૂટપાથ મેયર' કહે છે) એ ક્રિકેટની IPL ની તર્જ પર 'ઇન્ડિયન પેડેસ્ટ્રિયન લીગ' શરૂ કરી હતી. રોયલ ચેલેન્જર્સ બેંગલુરુની દરેક મેચ વખતે તેમની ટીમે કચરાથી ભરેલા ૨૪ જેટલા મુખ્ય સ્થળોને સફાઈ કરીને ચાલવા યોગ્ય બનાવ્યા હતા. તેઓ ફૂટપાથની ગુણવત્તા ચકાસવા માટે બાળકની પ્રામ (Perambulator) સાથે ચાલે છે—જો પ્રામ સરળતાથી ચાલે, તો ફૂટપાથ શ્રેષ્ઠ ગણાય!