બેંગલુરુ, તા.29: દેશની આઈટી રાજધાની ગણાતા બેંગલુરુમાં મોડી રાત્રે શરૂ થયેલા અનરાધાર અને મેઘતાંડવે સમગ્ર શહેરને જળબંબાકાર કરી મૂક્યું છે. આખી રાત સતત વરસેલા મુસળધાર વરસાદના કારણે શહેરના મુખ્ય માર્ગો નદીઓમાં ફેરવાઈ ગયા હતા. ભારે વરસાદ અને વિઝિબિલિટી નહિવત થઈ જવાના કારણે વાહનવ્યવહાર પર માડી રાતથી જ ગંભીર અસર પડી હતી, જેનાથી વહેલી સવારે નોકરી અને કોલેજ જતા હજારો લોકો રસ્તા પર અટવાઈ પડ્યા હતા.

મલ્લેશ્વરમમાં મહાકાય વૃક્ષો ધરાશાયી

વરસાદના સપાટા સાથે વાગેલા ભારે પવનને કારણે શહેરના પોશ વિસ્તાર ગણાતા મલ્લેશ્વરમ સહિત આસપાસના વિસ્તારોમાં અનેક સ્થળે મહાકાય વૃક્ષો અને વીજળીના થાંભલા ધરાશાયી થયા હતા. મલ્લેશ્વરમમાં મુખ્ય રસ્તા પર જ એક મોટું વૃક્ષ ધરાશાયી થતાં વાહનવ્યવહાર સંપૂર્ણપણે ખોરવાઈ ગયો હતો. સુનિયોજિત તંત્રના દાવા વચ્ચે વીજ પુરવઠો ગુલ થઈ જતાં સમગ્ર વિસ્તાર અંધારપટમાં ફેંકાઈ ગયો હતો.

રસ્તાઓ પર પૂર જેવા દ્રશ્યો, નીચાણવાળા વિસ્તારોમાં પાણી ઘૂસ્યા

બેંગલુરુના મુખ્ય માર્ગો પર ઘૂંટણસમા પાણી ભરાઈ જવાથી અસંખ્ય કાર, બાઇક અને ઓટોરિક્ષાઓ બંધ પડી ગઈ હતી. નીચાણવાળા વિસ્તારોમાં સ્થિતિ વધુ વણસી હતી, જ્યાં લોકોના ઘરો અને સોસાયટીઓના પાર્કિંગમાં પાણી ઘૂસી જતાં મોટું નુકસાન થયું છે. ટ્રાફિક પોલીસ અને મ્યુનિસિપલ કોર્પોરેશન (BBMP) ની ટીમ રસ્તાઓ પરથી વૃક્ષો હટાવવા અને પાણીના નિકાલ માટે યુદ્ધના ધોરણે કામગીરી કરી રહી છે.

સ્થાનિક હવામાન વિભાગના જણાવ્યા અનુસાર, આગામી ૨૪ કલાકમાં હજુ પણ ભારે વરસાદ થવાની શક્યતા છે, જેના પગલે નાગરિકોને બિનજરૂરી બહાર ન નીકળવા અને સાવચેતી વર્તવા માટે અપીલ કરવામાં આવી છે.