​દુબઈ: યુદ્ધ અને તંગદિલીના વાતાવરણ વચ્ચે ક્યારેક મુસાફરોનો ડર અકલ્પનીય વળાંક લેતો હોય છે. આવી જ એક ચોંકાવનારી ઘટના ફ્લાયદુબઈની એક ફ્લાઈટમાં સામે આવી છે, જ્યાં બે પાયલોટોએ પોતાની સૂઝબૂઝથી સેંકડો મુસાફરોના જીવ બચાવ્યા હોવા છતાં, મુસાફરો આખી મુસાફરી દરમિયાન એ ડર હેઠળ જીવતા રહ્યા કે પાયલોટ વિમાનને હાઇજેક કરીને ઈરાન તો નહીં લઈ જાય!

​મળતી વિગતો અનુસાર, કટોકટીની સ્થિતિ વચ્ચે ફ્લાયદુબઈના બે ઈરાની પાયલોટ ભારે અરાજકતા અને હિંસક ટોળા વચ્ચેથી મુશ્કેલીથી બચીને એરપોર્ટ પહોંચ્યા હતા. તેમણે સમયસૂચકતા વાપરીને વિમાનને એરપોર્ટ પરથી સલામત રીતે ટેકઓફ કરાવ્યું હતું.

​જોકે, જ્યારે મુસાફરોને ખબર પડી કે વિમાન કોકપિટમાં બેઠેલા બંને પાયલોટ મૂળ ઈરાનના છે, ત્યારે બચવાનો આનંદ ક્ષણભરમાં ભયમાં ફેરવાઈ ગયો હતો. મધ્ય પૂર્વમાં ચાલી રહેલા રાજકીય તણાવ અને યુદ્ધની સ્થિતિને કારણે મુસાફરોના મનમાં ભારે શંકા જાગી હતી. મુસાફરોને સતત એવો ડર સતાવી રહ્યો હતો કે આ પાયલોટો વિમાનને તેના નક્કી કરેલા માર્ગ પર લઈ જવાને બદલે ઈરાન તરફ વાળી દેશે.

​મુસાફરી દરમિયાન વિમાનમાં ભારે તણાવપૂર્ણ માહોલ જોવા મળ્યો હતો. મુસાફરો દરેક ક્ષણે વિમાનના રૂટ પર નજર રાખી રહ્યા હતા. જોકે, પાયલોટોએ પોતાની વ્યાવસાયિક નિષ્ઠા અને ફરજપરસ્તતાનો પરિચય આપતા વિમાનને સુરક્ષિત રીતે તેના નિર્ધારિત ગંતવ્ય સ્થાન પર લેન્ડ કરાવ્યું હતું.

​સલામત લેન્ડિંગ બાદ મુસાફરોએ રાહતનો શ્વાસ લીધો હતો. આ ઘટના એ વાતની સાક્ષી પૂરે છે કે ભયના વાતાવરણમાં લોકો કેવી રીતે પોતાના રક્ષકો પર પણ શંકા કરવા મજબૂર બની જાય છે, છતાં પણ પાયલોટોએ તમામ દબાણ વચ્ચે પોતાની ફરજ સફળતાપૂર્વક નિભાવી હતી.