બેરૂત : લેબનોન અને ઇઝરાયલ વચ્ચે ૧૭ એપ્રિલથી અમલી બનેલા યુદ્ધવિરામ પર જોખમના વાદળો ઘેરાયા છે. ઇઝરાયલ લશ્કરે રવિવારે દક્ષિણ લેબનોનના કબજા હેઠળના વિસ્તારની બહાર આવેલા ૧૦થી વધુ ગામડાઓ અને નગરો માટે નવી સ્થળાંતર ચેતવણીઓ જારી કરી છે. લશ્કરના અરબી પ્રવક્તા અવિચાય અદરીએ સોશિયલ મીડિયા પર પોસ્ટ કરીને નાગરિકોને તાત્કાલિક ઘરો ખાલી કરી ઓછામાં ઓછા ૧,૦૦૦ મીટર દૂર ખુલ્લા વિસ્તારોમાં જવા આદેશ આપ્યો છે. આ ચેતવણીમાં લિટાની નદીની ઉત્તરે આવેલા નબાતીહ જિલ્લાના મહત્વના વિસ્તારોનો સમાવેશ થાય છે, જે યુદ્ધવિરામની શરતો વચ્ચે નવા સંઘર્ષના સંકેત આપે છે.
ઇઝરાયલી સૈન્યની આ આક્રમકતા પાછળ હિઝબુલ્લાહ દ્વારા કરવામાં આવેલા ડ્રોન હુમલાઓને જવાબદાર માનવામાં આવે છે. તાજેતરમાં હિઝબુલ્લાહે ફાઇબર-ઓપ્ટિક કેબલથી નિયંત્રિત અત્યાધુનિક અને સસ્તા ડ્રોનનો ઉપયોગ શરૂ કર્યો છે, જે ઇલેક્ટ્રોનિક જામિંગથી સુરક્ષિત હોવાને કારણે ઇઝરાયલી દળો માટે માથાનો દુખાવો બન્યા છે. આ હુમલાઓમાં બે સૈનિકો અને એક સૈન્ય કોન્ટ્રાક્ટરના મોત બાદ ઇઝરાયલના લશ્કરી વડા ઇયાલ ઝમીરે સ્પષ્ટ ચેતવણી આપી છે કે 'યલો લાઇન' ની બહાર પણ જો આપણા દળો કે સમુદાયો સામે ખતરો જણાશે, તો તેને કોઈપણ ભોગે જડબાતોડ જવાબ આપીને દૂર કરવામાં આવશે.
લેબનોનની રાષ્ટ્રીય સમાચાર એજન્સીના અહેવાલ મુજબ, ઇઝરાયલે ચેતવણી આપેલા વિસ્તારો ઉપરાંત અન્ય નગરોમાં પણ શ્રેણીબદ્ધ હુમલાઓ શરૂ કરી દીધા છે. એક તરફ અમેરિકા બંને દેશો વચ્ચે સીધી શાંતિ વાટાઘાટો માટે દબાણ કરી રહ્યું છે, ત્યારે બીજી તરફ લેબનોનના રાષ્ટ્રપતિ જોસેફ આઉને માંગ કરી છે કે કોઈ પણ ચર્ચા પહેલા ઇઝરાયલે યુદ્ધવિરામનો સંપૂર્ણ અમલ કરવો જોઈએ. સરહદી વિસ્તારોમાં વધતી જતી સૈન્ય હિલચાલ અને ડ્રોન યુદ્ધના કારણે આ વિસ્તારમાં ફરી એકવાર મોટા પાયે હિંસા ફાટી નીકળવાની દહેશત સેવાઈ રહી છે, જેનાથી સામાન્ય જનતામાં ફફડાટ વ્યાપી ગયો છે.