નવી દિલ્હી : ભારતીય રમતના ઈતિહાસમાં અમિટ છાપ છોડનાર પીઢ શૂટર અને દિગ્ગજ રમતગમત પ્રશાસક રાજા રણધીર સિંહે આજે 79 વર્ષની વયે અંતિમ શ્વાસ લીધા. લાંબી બીમારી બાદ તેમના નિધનથી રમત જગતમાં ભારે શોકનું મોજું ફરી વળ્યું છે. પટિયાલાના શાહી પરિવાર સાથે સંબંધ ધરાવતા રાજા રણધીર સિંહ માત્ર એક ઉત્કૃષ્ટ ખેલાડી જ નહોતા, પરંતુ આંતરરાષ્ટ્રીય સ્તરે ભારતીય રમતગમતનું નેતૃત્વ કરનાર એક પ્રભાવશાળી વ્યક્તિત્વ પણ હતા. તેઓ પંજાબના ભૂતપૂર્વ મુખ્યમંત્રી કેપ્ટન અમરિંદર સિંહના પિતરાઈ ભાઈ હતા.
રમતગમત વારસાની ચોથી પેઢી
રાજા રણધીર સિંહ એક અત્યંત પ્રતિષ્ઠિત રમતગમત પરિવારની ચોથી પેઢીના સભ્ય હતા. તેમના કાકા મહારાજા યાદવિન્દ્ર સિંહે ટેસ્ટ ક્રિકેટમાં ભારતનું પ્રતિનિધિત્વ કર્યું હતું, જ્યારે તેમના પિતા રાજા ભાલિન્દ્ર સિંહે દાયકાઓ સુધી ભારતીય ઓલિમ્પિક સમિતિમાં યોગદાન આપ્યું હતું. રણધીર સિંહે પોતે પાંચ વખત ઓલિમ્પિકમાં ભાગ લઈને અને એશિયન ગેમ્સમાં સુવર્ણ ચંદ્રક જીતીને પોતાના પરિવાર અને દેશનું નામ રોશન કર્યું હતું. અર્જુન પુરસ્કાર વિજેતા રહેલા રણધીર સિંહ ભારતની ખેલકૂદની સફરમાં એક અનોખું સ્થાન ધરાવતા હતા.
વૈશ્વિક મંચ પર ભારતનો પ્રભાવ
ખેલાડી તરીકેની સફળતા બાદ, તેમણે રમતગમત વહીવટમાં પણ અનેક મહત્વના હોદ્દાઓ શોભાવ્યા હતા. તેઓ આંતરરાષ્ટ્રીય ઓલિમ્પિક સમિતિ (IOC) ના સભ્ય અને બાદમાં માનદ સભ્ય તરીકે રહ્યા હતા. ઓલિમ્પિક કાઉન્સિલ ઓફ એશિયાના સેક્રેટરી જનરલ તરીકે તેમણે એશિયાઈ રમતોના વિકાસમાં મહત્વની ભૂમિકા ભજવી હતી. વર્લ્ડ એન્ટી-ડોપિંગ એજન્સી (WADA) માં IOC નું પ્રતિનિધિત્વ કરવું હોય કે સ્પોર્ટ્સ ઓથોરિટી ઓફ ઈન્ડિયા (SAI) માં યોગદાન, તેમણે દરેક સ્તરે પોતાની ક્ષમતા સાબિત કરી હતી.
નેશનલ રાઇફલ એસોસિએશન ઓફ ઈન્ડિયા (NRAI) સહિત દેશની વિવિધ રમત સંસ્થાઓએ તેમના નિધન પર ઊંડા દુઃખની લાગણી વ્યક્ત કરી છે. રાજા રણધીર સિંહના વિદાયથી ભારતીય રમતગમત જગતે એક એવા પ્રશાસકને ગુમાવ્યા છે, જેમણે ભારતીય ખેલાડીઓને વૈશ્વિક ઓળખ અપાવવામાં મહત્વપૂર્ણ ભૂમિકા ભજવી હતી. તેમનું યોગદાન આવનારી પેઢીઓ માટે હંમેશા પ્રેરણાદાયી બની રહેશે.