મનાલીની સોલાંગ વેલીમાં ૯ થી ૧૨ ઓક્ટોબર પ્રથમ પેરાગ્લાઇડિંગ એકયુરસી પ્રી વર્લ્ડ કપ
આકાશમાં જામશે સાહસનો મુકાબલો ફાતરુથી ઉડાન ભરી નિર્ધારિત લક્ષ્ય પર ઉતરવાની કસોટીઃ છ મહિલા સહિત ૮૬ થી વધુ પાઇલટોની ભાગીદારીની અપેક્ષા
મનાલી, તા. ૧ : હિમાચલ પ્રદેશના મનાલીમાં પ્રથમ વખત પેરાગ્લાઇડિંગ એકયુરસી પ્રી વર્લ્ડ કપનું આયોજન થવા જઈ રહ્યું છે. સોલાંગ ખીણમાં આગામી ૯થી ૧૨ ઓક્ટોબર, ૨૦૨૬ દરમિયાન યોજાનારી ચાર દિવસીય સ્પર્ધાનું આયોજન મનાલી પેરાગ્લાઇડિંગ એસોસિએશન દ્વારા કરવામાં આવ્યું છે. આંતરરાષ્ટ્રીય હવાઈ રમતગમત મહાસંઘની સત્તાવાર સ્પર્ધા યાદીમાં પણ આ આયોજનને શ્રેણી-૨ની માન્યતા સાથે નોંધવામાં આવ્યું છે.
આ સ્પર્ધા અગાઉ ૫થી ૮ ઓક્ટોબર દરમિયાન યોજાવાની હતી. જોકે, રાષ્ટ્રપતિ દ્રૌપદી મુર્મુના મનાલીના પ્રસ્તાવિત પ્રવાસને ધ્યાનમાં રાખીને આયોજકોએ તારીખોમાં ફેરફાર કર્યો છે. તેથી જૂના પ્રચારપત્રમાં દર્શાવેલી તારીખોના બદલે હવે સ્પર્ધા ૯થી ૧૨ ઓક્ટોબર દરમિયાન યોજાશે. સ્પર્ધાનું સ્થળ સોલાંગનાલાની સ્કી ઢલાન રહેશે.
૨૬ સપ્ટેમ્બરના અહેવાલ મુજબ, આ આંતરરાષ્ટ્રીય સ્પર્ધામાં છ મહિલા સહિત ૮૬ થી વધુ પાઇલટોની ભાગીદારીની અપેક્ષા છે. એસોસિએશનના પ્રમુખ વેદરામના જણાવ્યા અનુસાર, ભારતના વિવિધ વિસ્તારો ઉપરાંત વિદેશના પાઇલટો પણ ભાગ લેશે. સ્પર્ધકો આશરે ૧૦,૦૦૦ ફૂટની ઊંચાઈએ આવેલા ફાતરુથી ઉડાન ભરી સોલાંગનાલામાં નિર્ધારિત લક્ષ્યની નજીક ઉતરવાનો પ્રયાસ કરશે. અહીં પાઇલટની ગ્લાઇડર પરની પકડ અને ચોકસાઈપૂર્વક ઉતરવાની કુશળતાની કસોટી થશે.
આયોજકોના જણાવ્યા અનુસાર, સ્પર્ધાને સુચારુ અને સુરક્ષિત રીતે યોજવા તૈયારીઓ ચાલી રહી છે. રાજ્ય સરકાર અને મનાલીના ધારાસભ્ય ભુવનેશ્વર ગૌડનો સહયોગ મળી રહ્યો છે. વેદરામે આશા વ્યક્ત કરી છે કે આ આયોજન સ્થાનિક સાહસિક રમતગમતને પ્રોત્સાહન આપવા સાથે મનાલીના પ્રવાસન ક્ષેત્રને નવી ગતિ આપશે.
(3:22 PM IST)
છેલ્લા 8 દિવસમાં સૌથી લોકપ્રિય 
