કોલકાતા તા.૧૯: કોલકાતાની એક હોટલમાં બુધવારે વહેલી સવારે ભીષણ આગ લાગી, જેમાં ઓછામાં ઓછા નવ લોકોના મોત થયા અને છ અન્‍ય લોકો ગંભીર રીતે ઘાયલ થયા

અહેવાલો અનુસાર, આજે વહેલી સવારે હોટલના મોટાભાગના રહેવાસીઓ ઊંઘી રહ્યા હતા ત્‍યારે આગ લાગી. ધુમાડા અને જ્‍વાળાઓના ગોટેગોટાથી પરિસરમાં ગભરાટ ફેલાયો. માહિતી મળતાં, પોલીસ અને ફાયર બ્રિગેડના અનેક વાહનો તાત્‍કાલિક ઘટનાસ્‍થળે પહોંચ્‍યા અને બચાવ અને રાહત કામગીરી શરૂ કરી.

ફાયર વિભાગના જણાવ્‍યા અનુસાર, કોલકાતાના મિર્ઝા ગાલિબ સ્‍ટ્રીટ પર આવેલી એક હોટલમાં રાત્રે ૨ વાગ્‍યાની આસપાસ આગ લાગી અને તે ઝડપથી વધી ગઈ. ઘટનાસ્‍થળે જ નવ લોકોના મોત થયા અને ઘણા લોકો ઘાયલ થયા. મૃતકો બાંગ્‍લાદેશી નાગરિકો હતા જેઓ તબીબી સારવાર માટે આવ્‍યા હતા.

આગમાંથી નીકળતા ધુમાડાને કારણે ફાયર ફાઇટર્સને આગ ઓલવવામાં ઘણી મુશ્‍કેલીનો સામનો કરવો પડ્‍યો, જેના કારણે સીડી દ્વારા ઉપરના માળ સુધી પહોંચવું મુશ્‍કેલ બન્‍યું. ઘણી મહેનત પછી, ફાયર બ્રિગેડની ટીમે આગ પર સંપૂર્ણ કાબુ મેળવી લીધો છે. જોકે, આગ લાગવાનું કારણ હજુ સ્‍પષ્ટ નથી. પોલીસ અને ફોરેન્‍સિક ટીમો આ મામલાની તપાસ કરી રહી છે.

નોંધનીય છે કે સોમવારે બીરભૂમ જિલ્‍લામાં પણ આવી જ એક ઘટના બની હતી. ચાર માળની હોટલમાં આગ લાગવાથી સાત લોકોના મોત થયા હતા. આગ શોર્ટ સર્કિટને કારણે લાગી હતી. તે સમયે, શ્રાવણ મહિનાનો છેલ્‍લો સોમવાર હોવાથી હોટલ યાત્રાળુઓથી ભરેલી હતી.